Jamita : Josua 24:14-24 HADAULATON NI NA MARROHA IBADAH YANG SEJATI

 

Jamita : Josua 24:14-24

 

HADAULATON NI NA MARROHA IBADAH YANG SEJATI

 

Huria ni Tuhanta…Ala naeng dapot ma ujung ni panggomgomion ni si Josua di bangso Israel, diparatarata si Josua ma songon dia haporseaon dohot hasatiaon ni bangso Israel tu Debata na manogihon nasida haruar sian parhatobanon Misir. Asa tung unduk bangso Israel tu Debata nang pe molo dung mate si Josua. Alani i do umbahen na pola dipatorang si Josua angka dia ma naung dibahen Debata tu bangso Israel dohot tu angka ompu nasida.

Dihirim si Josua do asa tongtong imbaru komitmen ni bangso Israel, tu padan na pinasahat ni Debata tu ompu nasida ima si Abraham, marhite padan nasida. Ia tujuanna ima asa tongtong bangso Israel olo diuluhon Debata (ayat. 15-18), jala olo mangulahon padan i (ayat 19-24).

Ido umbahen na jumolo si Josua mambahen pilihon laho mangihuthon Debata na manogihon ompu nasida harus sian parhatobanon Misir diadopan ni bangso Israel. Boasa pola pilliton dope debata na asing, na so tontu, na so hea binege jala debata naung tinaluhon ni Debata ni si Abraham? Naung terbukti huasoNa sahat tu si Musa. Adong dope sidalian ndang mamillit Ibana? Alai, dihirim si Josua do haputusan na binahen ni bangso Israel ndang ala ni paksaan, ndang alani ikut ikutan, ndang alani soara torop. Alai ingkon alani pilihan sendiri do.

Dua hali dohot sengaja dilehon si Josua tu bangso Israel pertimbangan Debata si Abraham do manang debata na asing, nang pen a torop mangalusi “Jahowa Debatanta i do naeng oloannami”. Nian di ayat 14-16 diujungi dung dibaen si Josua haputusan laho mangihuthon Jahowa, dialusi bangso Israel do: dao ma sian hami, anggo tung manadinghon Jahowa laho mangoloi angka debata sileban. Dibahen si Josua do panimbangion na parjolo ima haburjuon ni Jahowa di ayat 17- 18, dohot hatop dialusi “hami pe, Jahowa do naeng oloannami”. Dungi dilehon si

Josua muse panimbangion na paduahon laho manulingkit roha ni bangso Israel huhut dipaandar hamaolon na mansai borat taringot tu na mangihuthon Jahowa ayat 19-20 “Debata parrimas do Ibana, ndang tagamon marpamuati rohaNa mida pangalaosionmuna dohot mida dosamuna. Dialusi bangso Israel ma muse paduahalihon di ayat 21 “sitongka ma anggo i, ingkon Jahowa do naeng oloannami”

Paujunghon pernyataan komitmen ni bangso Israel i, dibaen si Josua do nasida bangso i sandiri na gabe sitindangi dompak nasida, jala dipaujung ma paingothon bangso Israel asa diulahon nasida na rumingkot ima mangihuthon Jahowa ayat 24 “Jahowa Debatanta i do naeng oloannami, jala soaraNa i naeng tangihononnami” Diondolhon buku Josua on dia do sipilliton “Mangikuthon Debata ni si Abraham, Isak, Jakob dohot si Musa manang debata na asing”. Haputusan dihita do angka dongan jala pasti do adong konsekuensi ni haputusanta i. Alai ingot, ahu (Josua) ingkon Jahowa Debata do ihuthononku jala oloannami.

Huria ni Tuhanta…Molo disungkun, sadihari do ho gabe Kristen? Tontu adong do na mandok, ia au gabe Kristen nunga mulai sorang tu portibi on ala ompunami jala natorashu pe nunga sahalak Kristen. Jadi dang adong be sipillitonku na asing. Jala ditingki baru sorang sasahalak tu portibi on, ndang mamintor disungkun ibana gabe Kristen do manang ndang, nang pe sorang ibana ditongatonga ni keluarga Kristen, ala manang aha pe dang diantusi dope. Alai komitmen gabe sahalak Kristen nunga tahatindanghon secara sadar jala dang dipaksa ditingki hita “manghatindanghon Haporseaon/Malua” di jolo ni huria i. Komitmen i ima padan ni haporseaon, padan hasatiaon tu Debata dohot tu Jesus Kristus. Unang ma nian holan pamanganna manghatindanghon alai panghatindanghonon i marharoroan ma nian sian panandaon di Debata marhite pangajarion ni natoras, jala ditambai ma muse marhite na marguru malua di huria. Ido umbahen dung manghatindanghon haporseaon sasahalak, ingkon hot ma haporseaonna taringot tu “na mangolu do Debata jala mangula dibagasan ngoluna”?

Aha do na mangonjar rohanta gabe Kristen hita? Tung jotjot do hajolmaon on bimbang jala lupa gabe sahalak Kristen na manghaporseai Debata huhut mangasahon Debata ditingki mangadopi parungkilon. Manang olo hita lupa molo dung dapot angka na taparsittal, sai taetong doi alani hagogoonta, hape na dohot do Debata mangula ditongatonga ni pardalanan ni ngolunta. Tung jotjot do taida jolma i mangasahon “arta” nang “alealena”. Unang ma nian songon i masa di ngolunta, molo paralealeon do na tapangasahon boi do gabe marsigantung tu paruntungan do

manang harugian, jala on ma mambahen sai mian di hita pangalaho na materialisme. Materialisme, jonok do i tu pangalaho na mambahen dirina gabe hatoban ni mammon. Dang olo Debata bahenon marangkup, ndang lomo roha ni Debata diose jolma i padan naung dipadanhonna tu Debata. Pillit ma Debata do manang ndang.

Dipatangkas si Josua do tu bangso Israel soal pamilliton tu ise do nasida marsomba, na marlapatan dung sahat bangso Israel tu tano Kanaan, ndang mamintor boi nasida puas manjalo tano na niuarihon ni Debata tu nasida,jala menikmati hasil ni tano i. Alai dipangido Debata sian bangso Israel asa tongtong nasida marsomba tu Debata jala satia manangihon dohot mangulahon hataNa. Molo mulak hita tu tujuan ni Debata na mamboan Israel haruar sian Misir ima asa polin bangso Israel manomba Debata dibagasan hasintongan. Boasa ingkon di Kanaan bangso Israel patupa parsombaon tu Debata? Ai dang di sude inganan tahe boi marsomba (beribadah) tu Debata? Alusna ima asa gabe bangso na bolon nasida, satia, jala manongtong marsigantung tu Debata naung marmudumudu nasida haruar sian parhatobanon Misir sahat tu tano naung niuarihon ni Debata tu nasida. Ingot ma, manang ise na satia mangihuthon jala marsomba tu Debata naung mangalehon haluan dibagasan Jesus Kristus, sai donganan ni Debata do ibana mandalani ngolu siganup ari. Amen

 

Bahan Diskusi :

1.      Tapanghilalahon jala tahaporseai do na Debata do marmudumudu ngolunta? Molo tapanghilalahon jala tahaporseai do, boasa dope godang hita na mandele jala mangasahon gogona mandalani parngoluon on!

2.      Aha do sialana umbahen na maol hita satia mangulahon na nidok ni Debata?

 

Pdt. Hotbin F. W. Sitanggang, S.Th. Pendeta HKBP Resort Persatuan