Jamita : Johannes 6:24-35
DEBATA MANGALEHON SAGUSAGU HANGOLUAN
TU BANGSONA
Sada pandohan di bangso
Batak, “Mutu do siborok mangalului guluan, mutu do jolma mangalului hangoluan.” Dipatuduhon i do manang songon dia pandapot ni halak
hita taringot tu ngolu dohot na mangolu. Na arga sahali do ngolu i. Ala ni
argana, rade do toropan halak loja mangusahohon. Diadangi tusan dohot tu sadui,
digogo mangula dohot mansari arian sahat ro di borngin asa tung unang nian asal
mangolu, alai naeng ma na sapatutna.
Alai ngolu na songon dia do na nidokna disi? Torang do, ngolu pardagingon do i,
ndang lobi jala ndang hurang. Songon i ma na masa di parguruan huta Kapernaum, pangunjunan na masa tu Jesus na ro sian Halak Jahudi na sai holan manarihon
ngolu pardagingon.
Di
jolo ni turpuk on (ay. 1-13), ditamuei
Jesus 5000 halak di sada inganan di topi sabola habinsaran ni tao Galilea.
Malungun di ngolu na sonang, na gok roti dohot dengke na so pola hinalojahon,
naeng paksahonon ni natorop i do pabangkithon Jesus gabe raja (15). Pangunjunan
bolon do i di Tuhan i. Marsaringar do muse disi soara ni sibolis na di
pangunjunan na di halongonan i na mangusulhon
asa dipatujolo Jesus na paluahon jolma sian masalah ‘butuha’ (Mat.4:3). Ala ni
i, sumurut ma Ibana tu sada dolok. Marsogotna i, mangulahi do muse usaho ‘perajaan’ i (22 ). Di bagasan sada
panghataion na ganjang ditulak Jesus do i (25- 58). Disi, dipahusor Jesus do
pamingkirion ni natorop i sian na manghalungunhon roti tano on tu na
manghaporseai Ibana sandiri, dipahusor sian na manghasiholi ngolu
parsatongkinan tu na manghirim di hangoluan na saleleng ni lelengna (27). I ma na
gabe sibonsiri ni turpuk Johannes 6:24-35.
Masihol di tanda (Halongangan,
Mujizat). Marusaha do Halak Jahudi mangido tanda, alai tanda na mamanggar
(ndang sian joujou haporseaon-Ay.29), atik boha do tarpatupa ni Jesus tanda na jumago sian si Musa. Musa tuk patupahon
tanda sian banua ginjang marhite na paro Manna; ia
Jesus patupa halongangan marhite tanda na sian
toru (portibion) dope, i do manggohi rohanasida. Jadi, hira on ma na
naeng dohonon nasida, “Porsea pe ompunami di si Musa, ala na dilehon ibana do
nasida mangan Manna. Nuaeng pe, molo diigil Ho asa porsea hami di Ho, bahen ma
tanda na balga, lehon ma di hami roti na sian banua ginjang!” Maol tarjalo nasida marparhatudos Musa
dohot Jesus. Humebat dope si Musa dipikirannasida. Didok rohanasida, matorbanghu
do pangarajumion ni Jesus di diriNa, ai barani Ibana mangigil haporseaon sian
bangso i. Sandok, holan tu roti portibion do tarihot pingkirannasida.
Di ay.35, langsung ma Tuhanta Jesus
manghatindanghon diriNa, ninna ma, “Ahu do roti hangoluan i, sandok na so male be manang ise na ro tu Ahu;
jala na so tupa be mauas manang ise na porsea di Ahu.” Roti (sipanganon)
mambahen mangolu (ai ingkon mangan do sude asa mangolu). Na pinangan ni jolma
i, i do na na gabe ngolu dohot gogona; na diparhajob (cerna) jala saor tu
sandok dirina, na gabe daging dohot pamatangna. Ala ni i, ndang na masalpuhu,
alai tarjalo do molo didok na mandok, “Jolma i ma (aha) na pinanganna.” Di
bagasan arti dohot fungsi ni sipanganon na songon i ma digoar Jesus dison
diriNa ‘roti’, mandok: Ibana do hangoluan (pat.48; 11:25; 14:6). Hangoluan
dison ndada holan na marhahonaan tu pardagingon, alai lumobi do tu partondion.
Jesus do hangoluan, lapatanna: (1).
Ibana do silehon ngolu. Sipangolu sasadasa (sumber hidup satu-satunya). So di
bagasan dohot marhitehite Ibana, ndang adong na mangolu. (2). Ibana do
hangoluan. Ibana sandiri do hangoluan i (pat.1:4), mual, bona (hakiki)
ni hangoluan na sasintongna.
Di ruar ni Jesus, ‘ngolu’ na diparnampuna jolma ndang targoar dope i ngolu. (3). Ibana do
pardomuan dohot Debata. Ngolu, i ma pardomuan dohot Debata; parsaoran na di
bagasan tondi dohot haporseaon na mardame jala na rosu (intim), na hombar
(harmonis). Parsaoran sisongon i ndang jumpang agia ise i di ruar ni Jesus. Ala
ni i, ndang angka tanda i, isara aek na gabe anggur manang roti dohot dengke na marlompit ganda i,
alai tung Ibana sandiri do na rumingkot di jolma. Manang ise na porsea di Ibana
ndang male jala mauas be, alai taruli do di hasesaan, di haimbaruon dohot di
hadameon. Mangolu tahe saleleng ni lelengna.
Alani: Dao ma sian hita parange na
mardebata butuha, baliksa sotung gabe dibaen (dipertopengkan) angka ulaon
Harajaon ni Debata pagukguk hagiot nang parnampunaonna (memanfaatkan agama
untuk mendapatkan prestasi, kenyamanan egosentris). Une do na nunut, na ringgas mulamulaon, alai diginjangni saluhut,
ingkon haporseaon tu Jesus i do na manggabei nasa
siulaon. Taparhajob ma sipanganon pardagingon asa hipas, gopas pamatang, suang
le ma nang parsaoranta tu Tuhan Jesus tongtong ma taharinghothon, asa hipas,
bosuran tondinta. Tulus ma hita muse sahat tu ngolu na manontong surgo
hasonangan, alani haporseaonta tu Jesus Roti Hangoluan i. Amen.
Bahan Diskusi:
1. Sada
pandohan: SIPANGANON DOHOT PANGALAHO:
“Na pinangan ni jolma do manontuhon pangalahona”. Boha do pandapotta taringot
tusi? Aha do ngolu dohot hangoluan i dipingkiranta be.
2.
Di ulaon
siap ari, songon dia do dalan (cara, patupahon), tahobasi ngolu pardagingon,
baliksa ndang tading ngolu partondion.
Pdt. Rudi M. Simaremare, S.Th. Pandita HKBP Resort
Aekkanopan
Tidak ada komentar:
Posting Komentar