Ev. Psalm 19:8-15, Sun Denggan Do Patik Ni Jahowa (Firman Tuhan Itu Sempurna)

                                                                      Ev. Psalm 19:8-15

Sun Denggan Do Patik Ni Jahowa

(Firman Tuhan Itu Sempurna)

1. Patujolo

 

Kompas ima sada alat na berfungsi laho patuduhon arah/petunjuk jalan asa unang gabe lilu hita di pardalananta. Mercusuar pelabuhan ima sada alat/lampu penerang laho patuduhon tanda/sinyal/aba-aba tu nakhoda asa unang manimbil tu siamun nang tu hambirang alai asa terarah pardalanan ni kapal i jala dao sian mara, sahat/berlabuh dohot denggan. Suang songon i do muse jotjot do jumpang hita rambu-rambu lalu lintas, na mangaturhon pardalanan ni angka arus lalu lintas. Tung mansai denggan do tujuan ni rambu-rambu lalu lintas i dibahen asa maraturan angka pengendara jala asa unang masiboan lomolomona be. Ditongatonga ni keluarga pe adong do aturan na dibahen natoras asa tung denggan sude jala ndang masiboan lomona. Tung mansai uli jala denggan do nasa ruhutruhut, mangaturhon hasonangan do jala manghorhon las ni roha ala mangajari, mangarahon hita tu dalan na sintong.

 

II. Hatorangan ni Turpuk

 

Ido na na gabe joujou ni turpuk on, asa taradoti Hata nang patik ni Debata ai ido na mengarahkan, paingothon ngolunta di portibion ai tung marguna situtu do i di hita jala mambahen las rohanta. Diendehon Raja Daud do hinadenggan ni patik manang hata ni Debata na manjadi tu bagasan ngoluna songoni nang tu angka na manjalo Hata ni Debata. Nasa na mangolu jala na pahombarhombar ngoluna tu Hata ni Debata, bontor ma sandok ngoluna jala nasa na niulana manjadi do. Patik ni Debata tung mansai marpanghorhon do di ngolu ni jolma. Halak na so mardalan di hata ni Debata boi do gabe sisoada na adong di ibana, manang aha pe na sinangkapanna maol dapotsa.

 

Mangihuthon Raja Daud adong manang piga hinadenggan ni hata ni Debata naung jinalona di ngoluna: Parjolo, Hata ni Debata digoari do patik, aturan, ramburambu ido na gabe sipasingot, patron, petunjuk arah laho mangurupi hita asa mamillit dalan na denggan jala ulaon na patut siulahononhon. Paduahon, hata ni Debata na sun denggan, tidak bercela, tidak ada unsur yang salah jala sintong, ndang mubauba hata ni Debata huhut haposan do hataNa i. Ima na mangalehon habisuhon dihasintongan huhut manghaporseai Ibana di angka na rade marsiajar sian hataNa i. Na sun denggan do patik ni Debata boi pasabam roha. Molo sai nijaha hata ni Debata, dipahusorhusor dibagasan roha boi doi pasabam roha. Patoluhon, tigor do hataNa i ndang adong gabus dohot na peol sian hataNa i, ido umbahen hata ni Debata mangalehon pos ni roha di jolma di sandok pardalanan ni ngoluna. Paopathon, sai tiur do parnidaan marnida na pita. Pita do patik ni Debata mambahen tiur parnidaan. Laos na pita jala badia do Jahowa, jadi nasa na marharoroan sian Jahowa, na pita do i jala badia tarlumobi ma hataNa. Hata ni Debata mangalehon hatiuron parnidaan, molo tiur parnidaan, tiur ma pardalanan jala ndang tagamon lilu angka na porsea di Ibana. Na badia do Tuhan i, ingkon dibagasan habadiaon do hita laho manomba Ibana. Ingkon hot do tongtong pita parsombaonta tu Ibana ala marhite ido angka na porsea laho patuduhon unduk dohot haserepon ni roha, songon i nang parsitutuon na marhadaulaton. Palimahon, molo dung diulahon jolma i hata manang patik ni Debata, dapotan uli jala tua ma ibana. Gariada tahe lobi sian arta dohot sinamot. Ummarga do hata ni Debata sian mas dohot sere palangki na godang situtu. Sere dohot mas ima arta na arga na dihasiholi torop jolma adong dingoluna. Alai mangihuthon Raja Daud, dao do ummarga hata ni Debata sian mas dohot sere manang hamoraon na asing i. Songon i ma hata ni Debata naung gabe jolma ima Jesus Kristus naung manesa dosanta, ndada marhite sere manang perak, alai marhite mudarNa na durus di hau silang i do. Arga situtu do panobusion ni Jesus di jolma i marhite mudar Na, dipaingot hita ai arga do hita ditobus. Alani tapasangap ma Ibana marhite nasa na adong dingolunta. Tung arga situtu do patik ni Debata di hita manisia, ai marhite i boi ma hita mangantusi songon dia lomo ni roha ni Debata. Tung godang situtu do upa ni na mangaradoti patik ni Debata, gabe mamora hita dibahen, ndada holan di pardagingon alai dohot do nang di partondion. Ndang mambahen lilu patik i dingolunta gariada tahe mangajari hita mananda dosa dohot hasalaanta. Molo tatanda dosanta dungi pangidoonta ma hasesaan ni dosa sian Debata, asa malua hita sian dosa i.

 

Dipangido Raja Daud do asa dao ibana sian ragam ni angka ginjang ni roha, ai nasa na adong di ibana i, holan ala asi ni roha ni Debata do i dingoluna. Ndang dihalomohon Debata angka na ginjang marroha gariada dihasogohon do pangalaho sisongon i. Alani sipasidingon ma pangalaho ginjang ni roha sian ngolu ni jolma. Tung marsitutu do raja Daud asa monang maralohon dosa, mangolu dibagasan habadiaon marhitehite hata ni Debata. Diparhatopot ibana holan marhite na mangunsande tu hata ni Debata do ibana boi holang sian dosa, ai hataNa i do na gabe pagar, sipasingot di na marpangalaho hita dingolunta. Molo sai ni sigatan hata ni Debata, i do na patuduhon parsigantunganta tu lbana di na mangadopi hamaolonta dingoluon. Pos ma rohanta na ditangihon Tuhan i do hita ala parsitutuonta manghatindanghon, na Tuhan i do parsigantunganta, partanobatoanta jala siluluhon hita.

 

III. Sipahusorhusoron

 

1. Tahangoluhon ma patikNa i ai i do na gabe patron laho paingothon hita di ragam ni ngolunta asa malua hita.
2. Taharingkothon ma manangihon, mangantusi, mangulahon hata ni Debata dingolunta. Ragam do upa sipasahatonNa tu hita molo taradoti patikNa i. Sian na manangihon do tubu haporseaon jala haporseaon i do na mambahen malua hita sian dosa.
3. Unang manimbil sian patik ni Debata, ai ummarga do i sian nasa na adong di portibi on. Ai patik ido na mangarahon hita mangulahon lomo ni rohaNa jala pasiding angka na roa.

Marsihohot, marsomba ma hita tu Debata huhut mangaranap dompak Jahowa (Okuli) ala rade do Ibana manjanghon hita na mangolu dibagasan patikNa i. Sun denggan do Hata ni Debata di ngolu ni angka na marhaposan tu Ibana jala na mangulahon hataNa i. Amen.