BAHAN
SERMON HKBP DISTRIK XIII ASAHAN LABUHAN BATU
Minggu, 11
Agustus 2024 (XI Dung Trinitatis)
Ev. Epesus
4:25-32
Ep:
Psalmen 34 : 1-8
TOPIK:
NGOLU NA IMBARU DI BAGASAN KRISTUS
I. PATUJOLO
Epesus bindu 4 on boi do dibagi dua
i ma, Parjolo, Ayat 1 - 16 mangajarhon asa marsada huria i doshon sada
pamatang; Paduahon, Ayat 17 - 32 mangajari huria i asa mangolu di bagasan
habadiaon. Domu tu joujou i, huria manang angka na tarjou tu parsaoran i, dipaingot
do mambolongkon ngolu na buruk jala mangolu di bagasan haimbaruon di bagasan
Kristus (pat. 2 Korint 5:17" Asa molo di bagasan Kristus halak, na tinompa
na imbaru ma i, nunga salpu pangalaho na robi gabe imbaru"). Hataridaan ni
sasahalak naung marngolu na imbaru mangihuthon Ap. Paulus, molo jumpang
hatigoran, hadameon dohot las ni roha di ngoluna (pat.Rom 14:17). Jala molo
didok na tinompa na imbaru, marlapatan do i dumenggan sian na sai laonna i,
ndang terpaut manang tarihot be tu ngolu manang parange na buruk i. Adong do
hata na marpardomuan tu ngolu manang parange na imbaru, i ma “agatos” dohot
kalos. Agatos marlapatan do i, bermutu, berkualitas, hakekatnya teruji; jala
“kalos” marlapatan cantik, menawan, sedap dipandang mata,, hanya dengan melihatnya
seseorang berkeinginan memilikinya. Naeng ma songon i ngolu ni angka siihuthon
Kristus di portibi on songon hataridaan naung dihangoluhon ngolu na imbaru i.
II. HATORANGAN NI TURPUK
❖
Mananggali jolma na buruk i ma gabus,rimas manangko, dohot
hata na busuk.
Asa tumangkas antusanta turpuk on,
mansai denggan molo ta jaha ayat 22, disi didok Paulus do," Tanggali hamu
ma jolma na buruk i, isara di pangalaho na jolo, ai laho mago do i hinorhon ni
angka hisaphisap sipaotooto". Ido umbahen dibuhai Ap. Paulus ayat 25 on
marhite hata, "Dibahen i" patuduhon adong relasina tu ayat andorang
so turpuk on (Ayat 17-24) na membandingkan songon dia parange ni jolma na buruk
na ingkon bolongkonon dohot hoha rumang ni parange na imbaru sisolukhonon
(sihangoluhonon).
Nuaeng taida ma rumang ni parange na
buruk i di turpuk on, Parjolo "Gabus", pola do didok Ap. Paulus,
bolongkon hamu gabus i, hatahon hamu ma na sintong ganup tu donganna, Dr.
Johnson domu tu Pendidikan anak, mandok “Biasakanlah anak-anak anda untuk
berbicara benar. Kalau anak-anak itu menuturkan sesuatu yang tidak benar,
segeralah lakukan pembetulan". Jangan membiarkan hal sedemikian itu
berlarut-larut agar tidak terjadi penyimpangan-penyimpangan yang lebih
parah". Domu tu si do pandohan ni Ap. Paulus di ayat on. Didasdasi Paulus
do asa ganup ruas ni huria i, manghatahon na sintong jala na tau pauliulihon.
Tudos do i tu pamatang, molo sintong do sada informasi i dipasahat utokutok,
tontu manghorhon uli do i tu ruas ni pamatang i. Sabalikna, molo so denggan do na
pinasahat ni utokutok i, tontu manghorhon na hurang denggan do i tu ruas ni
pamatang. Gabus boi do i patubu pargasipan (Poda 26:28), jala samalomalo ni
sasahalak margabus ujungna habotoan do i ( Poda 12:19). Paduahon,
"Rimas", Didok Ap. Paulus di ayat 26 "Ia tarrimas hamu unang ma
mardosa. Unang sanga mate mata ni ari, so mintop rimasmuna". Mangihuthon
Ap. Paulus, molo so jumpang do habonaron (Kejujuran) di parsaoran i, molo
masigabusan na sada maradophon donganna, tontu gabe tubu ma sikap na saling
mencurigai tarlobi rimas i, adong keinginan mamalos na jat aloni na jat. Ap.
Paulus di suratna tu huria Rom Bindu 12:19 mandok "Hamu angka na
hinaholongan, unang hamu marlulu pasahat hamu mal rimas i (tu Debata), ai
tarsurat do: Di Ahu do pamaloson, Ahu pe mamaloshon, ninna Tuhan i". Asa
marhite pandohan ni Ap. Paulus di ayat 26 i mangalehon pangantusion, ingkon
marusaha do ganup ruas ni pamatang i, bangkol tarrimas (Jak 1:19), "Ai
baoa parpiripiri pahehe parbadaan alai anggo halak na lambat tarrimas mangintopi
"pargulutan (pat. Poda 15: 18). Patoluhon, Diuduti Paulus do mangalehon
sipaingot "Naung manangko i unang be manangko, mulaulaon ma ibana,
tanganna i ma sumarihon ngoluna asa adong lehononna tu na hurangan (Ay
28)". Manangko di partingkian na parpudi on, ndada holan diulahon angka na
tardok golongan ni angka na pogos, alai golongan elit, manang naung mamora pe
sai adong dope na lomo rohana mangulahon i. Alani dipaingot Ap. Paulus do huria
Epesus pasidingkon pangalaho i. Sada cara asa unang madabu tu pangalaho i, i ma
mulaulaon, tanganna i sumarihon ngoluna asa adong lehononna tu na pogos.
Mangihuthon Ap. Paulus, maralo situtu do -pangalahoi (manȧngko) tu status dohot
panjouon-na-sahat-tur nasida, tarlobi maralo tu status jolma na imbaru i.
Songon jolma na imbaru disosoi Ap. Paulus do asa mulaulaon (bekerja keras),
mangula ulaon na denggan marhite tanganna sandiri. Paopathon, “Unang ma ruar
hata na busuk sian pamanganmuna, naeng ma na denggan na tau padengganhon na
humurang asa dapotan uli na umbegesa. Mangihuthon Ap. Paulus, hata na busuk, na
so denggan somalna haruar sian pamangan ni angka na so tumanda Debata. Hata na
so denggan boi do i ruar uju tarrimas atau ketika suasana hati kita kurang
nyaman. Alani i tung tangkas do dijouhon Ap. Paulus huria Epesus, asa
manadingkon pangalaho sisongon i, jala manggontihonsa marhite hata na denggan,
na tau paulihon na humurang asa dapotan uli na umbegesa.
Hata na ruar sian pamangan i naeng
ma marguna mangalehon gogo tu na gale, mangapuli, memotivasi dohot na asing
(pat. Job 4:4 "Halak na tinggang hehe do muse binahen ni hatam, jala pat
angka na telluk telluk dipatogar ho"). Molo di Kolose 4:6, didasdasi Ap.
Paulus do lambok ma hatanta i songon na siniraan, asa botoon mambahen alus tu
ganup jolma.
❖
Unang ma arsahi hamu Tondi Porbadia ni Debata
Na mangihut di turpuk on dipaingot
Paulus do asa unang diarsahi huria i Tondi Parbadia i, ala Tondi Parbadia i do
na manjou, papungupunguhon jala pabadiahon (pat. Lapatan ni huria mangihuthon
Konfessi HKBP 1951& 1996 Bindu 8). Mangula do Tondi Parbadia-i di bagasan
rohanta ai joroNa do rohanta i (1 Korint 3:16, 1 Korint 6:19). Pangajari do
Tondi i, jala pangapul. Alani molo didok Ap. Paulus, unang ma arsahi hamu Tondi
Parbadia ni Debata, marlapatan do i, manggabusi Tondi Parbadia (Ananias dohot
Safira, Ul. 5: 3). Jala molo tauduti manjaha Epesus 5: 3-4 dipabotohon do
rumang ni pangalaho na mangarsahi Tondi ni Debata i ma, parmainanon dohot ragam
ni harorangon ro di pangahution, songon i nasa sihailahononhon, hata barangsi
dohot pargaitgaiton na so patut.
❖
Gabe basar ma hamu sama hamu, angka parasiroha, masisesaan
dosa
Diayat 31-32 on diondolhon Ap.
Paulus do hinaringkot ni ngolu na rade masianjuan diangka na hurang, pasiding
riting ni roha, muruk, rimas nang hata songgaksonggak dohot insakinsak songon i
nasa hajahaton. Bolongkonon do angka-pangalaho sisongon i jala gontihonon
marhite haradeon masisalpuan di angka na hurang. Boi do ulahonon ni ruas i di
tongatonga ni parsaoran marhite na tangkas manghangoluhon pengampunan dohot
tiruan na pinatupa ni Tuhan Jesus (Lukas 23:34" Jadi didok Jesus ma:"
Ale Amang! Marpamuati ma rohaM mida nasida, ai ndang diboto nasida na
binahennasida i"). Ai molo rade angka na porsea di Tuhan Jesus patupahon
sisongon i, tontu sesaon ni Debata do dosana (pat. Mat 6:14 -15" Ai ia
disesa hamu sala ni halak na dompak hamu, sesaon ni Amamuna na di banua ginjang
i do dohot dosamuna. Alai anggo so disesa hamu sala ni halak na dompak hamu,
ndang tagamon sesaon ni Amamuna nang dosamuna").
III. SIPAHUSORHUSORON
1. Ngolu na imbaru di bagasan
Kristus manang marparange na imbaru ido hataridaan ni hamubaon ni roha. Ap.
Paulus tangkas do mangondolhon rumang ni pangalaho na imbaru i di Galatia 5:22
i ma, Holong dohot las ni roha, dame dohot lambas ni roha, habasaron, habasaon,
haporseaon, halambohon dohot hatomanon. Ngolu na imbaru ndada sekedar tambal
sulam, alai secara total do ngolunta i imbaru, imbaru di parange, cara berfikir
dohot menyikapi sesuatu. Ngolu na imbaru di pataridahon marhite sai jumolo
manangkasi jala mangulahon lomo ni Tuhan i di ngoluna.
2. Taboto do mian do hita nuaeng di
tongatonga ni zaman na hatop berubah. Alani marhite turpuk on dipaingot do,
naeng ma tongtong tapatuduhon identitas dohot jati dirinta songon sahalak naung
dipaimbaru Tuhan i marhite asi ni rohaNa. Alani, hata ni Tuhan i ma tongtong
tatiop jala tapeop, asa margogo hita mangadopi jala manghamonangkon ragam ni
paraloan na ro tu ngolunta. Tangkas margogo jala mampu patuduhon jati dirinta
songon halak naung dipillit jala pinapulik ni Debata Debata (Rom 12:2
"Jala unang gabe sarombang hamu dohot portibi on; alai gabe imbaru ma hamu
dung muba pingkiranmuna, asa tau hamu manimbangi lomo ni roha ni Debata, i ma
na uli, na hinalashonNa dohot na sun denggan).
Tidak ada komentar:
Posting Komentar