Minggu Kantate, 28 April 2024. Topik : Ingkon Mamujimuji Jahowa Do Angka Na Usouso Di Ibana PSALMEN 22:26-32

 

Minggu Kantate, 28 April 2024.

Topik : Ingkon Mamujimuji Jahowa Do Angka Na Usouso Di Ibana

PSALMEN 22:26-32

 

I. PATUJOLO

Buku Psalmen i ma sada buku na mansai arga di tradisi dohot Pamujion ni halah Israel (1 Kro. 15: 16- 22; Psalm. 149:1-150: 6), mansai jotjot do buku Psalmen on, dipangke gabe tuntunan manang ojahan jala di angka ulaon parugamoon na dipangke halak israel. Maragam do angka panurat di buku Psalmen on isarana si Musa, bani Korah, bani Asaf, Salomo, Etan, Heman dohot na asing alai si Daud do na gumodang manuraton pola adong 73 Psalmen sian 150 bindu dibagasan buku on. Buku Psalmen di enet do on sian bahasa Heber ima "Tehillim" na margoar "Psalmor" jala di bahasa Yunani "Psalterion" na marlapatan "Puji-pujian” manang “buku Pujian" na mamangke alat musik. Maragam do angka bentuk dohot gaya panurathonon ni buku Psalmen on, adong ma i marhite-hite bentuk puji-pujian, tangiang pangidoan dohot hata hamuliateon.. Ia Psalmen 22 on ima taringot tu anggukangguk (ratapan) sian si Daud sandiri tu Debata na dibagasan pos ni roha manangihon soarana dohot paluahon ibana sian sitaonon na mansai dokdok. Psalmen 22 dibagi doi gabe 2 horong ima: naparjolo, Psalmen 1-22 taringot tu angguk badar ni sahalak namarparniahapan godang, sai songon naung ditinggalhon Debata panghilalaan nasida. Adong do angka penafsir na mandok bagian na parjolo on manggombarhon anggukangguk ni Tuhan Jesus ala siataononNa di hau pinorsilang i. Nasinoarahon ni si Daud di ayat 2 na mandok "Ale Debatangku, Debatangku, boasa tung tadinghononMu ahu?, laos ido muse disoarahon Tuhan Jesus di hau silang i (Mat 27:46). Napaduahon, Psalmen 22: 22-32 ima pujipujian marningot sude pambahenan ni Debata naung paluahon ngoluna sian haberniton i. Marende marsuraksurak ala salpu sitaonon i nang hamatean, jala Debata na gabe Raja di ngoluna.

 

II. HATORANGAN

Psalm on dipatomutomu si Daud ala manghilalahon pambahenan Ni Debata na pabalgahon ibana songon gabe raja. Parmahan naso niargahon ni jolma do ibana hape dipabangkit gabe raja. Lea do rohani si Goleath marnida si Daud, hape dipabalga Debata do ibana marhite na manaluhon si Goleath na bolon i. Lea do nang roha ni Saul marnida si Daud, hape diondingi jala dipalua Debata do ibana sian sangkap pamunuon ni si Saul. Marningot ido umbahen didok Psalmen on, "Sai jamitahononku ma goarmu tu angka hahanggiku, jala pujionku ma Ho di tongatonga ni huria, na marluhut i. puji ma Jahowa, hamu ale angka na manghabiari Ibana, sude pinompar ni si Jakob pasangaphon Ibana, jala sude pinompar ni Israel manghormat Iband" (23-24). Marende si Daud laho mamuji Debata dohot pasangaphon Ibana (23), ala Ibana do pangalualuan ni angka na lea dohot na dangol (25).

 

Ayat 26-27: tu Debata ma pujipujian ni angka na porsea i. Dung diarahon parPsalmen i angka natoropi mamuji Debata, didompakhon ibana ma Debata dungi didok ma "Ho do haroroan ni pujipujianhu". Lapatanna diparhatutu parPsalm on do paboa holan Debata sambing do haroroan ni saluhutna boi mandasdas rohana mamuji Debata, jala paboa na holan di Debata sambing do tama pujipujian. Nuaeng marpadan ma ibana; manggarar angka bagabaga na dijolo ni angka namanghabiari Ibana songon tanda hamauliateon disude denggan basa ni Debata. Pasahathon pelean tu Debata marhite napaluahon angka napogos, angka na ginosagosa, asa patar haluaon na sian Debata gabe parsidohot nasida mamuji Debata. Songon naposo ni Debata, ditangiangkon parPsalm i do angka natoropi anggiat tongtong marolopolop, tarapul jala margogo situtu mangadopi ragam ni haporsuhon. Asa tung porsea situtu nasida paboa naso tupa tadingkonon manang halupahonon ni Debata nasida dihaporsuhon i. On ma gabe Barita Nauli namanghorhon las ni roha dohot olopolop tu angka naporsea tu Debata. Sude pambahenan ni Debata dialusi marhite na girgir rohanasida mamuji Debata.

Ayat 28-32: Nasa bangso marnida haluaon na sian Debata. Haluaon napinatupa ni Debata tu parPsalm on, laos martudutudu do i nang tu haluaon sipamasaon ni Debata tu saluhut bangso (secara universal). Sude bangso, sian sundut tu sundut, ro be sogot marsomba tu Debata. Martudutudu do on nang tu panggomgomion ni Tuhan Jesus Kristus (Pil.2:1-11). Tung halongangan bolon do i di roha ni portibion. Parpsalmen dohot sude pomparanna sogot mangolu di Tuhan i, gabe jolma namamaritahon hagogoon dohot huaso ni Debata, jala jolma na satia tu Debata.

 

III. SIPAHUSORHUSORON

Marhite turpuk jamita on taida ma na ingkon ulahononta di ngolu siganup ari. Naparjolo, naeng ma mangulahon bagabaga tu Debata dibagasan hasatiaon. Mamuji Debata marhite pengakuan manang panghatindanghonon ni jolma di pambahenan ni Debata di ngoluna, manghatindaghon pambahenan ni Debata di ganup ngolunta be. Ai marsomba tu Debata do sogot sude nasa bangso parbegu (ayat 28).