Jamita : Psalmen 34:1-8 NGOLU NA IMBARU DI BAGASAN KRISTUS

 

                                                   Jamita : Psalmen 34:1-8

 

NGOLU NA IMBARU DI BAGASAN KRISTUS

 

Hamu angka dongan sahaporseaon, somalna molo nunga digohi biar ngolu ni jolma, sipata naso siulaon pe diula ma, bahkan angka na maralo tu lomo ni roha ni Debata pe diula ma i. Isarana molo mabiar hita ndang malum sahitta pintor mura do laho tu datu, molo maol jumpang na niluluanna lao ma mangido pasupasu tu somangot ni ompu, molo mabiar marpogos (naeng hatop mamora) gabe diula ma nakorupsi manang manangko. Hape ndang sadar jolmai diula pe songon i ndada boi mangalehon jalan keluar di parsorionna, baliksa gabe lam mamboan tu parsorion na lam umbagas. Alai molo mampu do hita mangadopi angka masalah di ngolunta on di bagasan hatoguon ni haporseaon jumpang hita ma alus/ jalan keluar di setiap permasalahan ni ngolunta on.

Di nanilele ni Raja Saul si Daud, gabe maporus do ibana tu huta Gat, ninna rohana ndang adong na mananda ibana disi, hape mangalualu do naposo ni Raja Akis mandok : Nda on do si Daud raja ni luat i? Nda taringot tu ibana do marende taripar angka parompuan songon on: Si Saul manaluhon marriburibu halak, alai anggo si Daud marloksaloksa do ditaluhon. Alani biar ni si Daud mida raja i, gabe dipaula ma ibana songon na lalaen (rintik) gabe ndang saut be ibana dijou tu jolo ni raja( 1 Samuel 21:10-15). Alai dinasongon i do dihilala ibana naso sintong na niulana i, gabe tubu ma rohana mamuji huhut mangalului Debata di parsorionna i, Ima na boi taida marhite turpuk jamita on.

1.    Manongtong mamuji Debata

Komitmen ni si Daud na mandok : “Pujionku ma Jahowa sipatsipat ni ari, sai tong ma pujipujianna di bagasan pamanganku” tontu na borhat do i sian kesadaran paboa holan huaso dohot hagogoon ni Debata do na boi paluahon ibana sian ancaman hamagoan, ima sian sangkap ni Raja Saul nanaeng mambunu ibana.

Nian nunga tung talpe ibana tu hamagoan i, alai ala diondingi Debata ibana gabe malua do ibana sian i. Asa ndang adong be alasan ni ibana so mamuji Debata, bahkan pola didok ibana sipat sipat ari, lapatanna ndang mansohot be ibana mamuji Debata, ndada holan ditingki las rohana manang ditingki ndang adong parmaraan, alai manang aha pe na masa di parngoluonna i, naeng tangkas ibana mamuji Debata. Boi si David manongtong mamuji Debata ala na dipanghilalahon ibana do paboa ndang sadia dope angka hamaolon na binolus ni jolma dibandingkon tu asiniroha ni Debata najinalona, lapatanna dao umbalga do asiniroha ni Debata sian persoalan-persoalan ni ngolu ni jolma i. Di Psalm 63:4-5 didok si Daud “Ai dengganan do asi ni rohaM sian hangoluan, sai pujion ni bibirhu ma Ho. Sai songon i ma pamujingku di Ho saleleng ahu mangolu, mangasahon goarmu paherbangonku ma tanganku tu ginjang (ptds BE 557:1+3 dao dumenggan). Molo boi ditanda jolma asiniroha ni Debata dingoluna, ido mangonjar rohana mamuji Debata, alai molo dirajumi do ngolunai berjalan secara alami, manang alani gogona tontu maol do i mamuji Debata, asa panandaon na tangkas di asiniroha ni Debata ido mangonjar hita mamuji Debata. Hape molo disadari jolma i, tung holan ala asiroha ni Debata sambing do umbahen boi hita mangolu. Didok si Jeremia di Andung 3:22 : Asiasi ni Jahowa sambing do umbahen so haru sun siap hami, ai ndang marpansohotan asi ni rohana i. Alani ido umbahen didok Paulus : Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus ( 1 Tes 5:18). Jala ndada holan hita naeng mamuji Debata alai dohot do donganta, alani ido arahononta torop halak mamuji Tuhan i, termasuk angka na nadangol asa gabe dohot nasida dapotan lasniroha.

2.    Mangalului jala joujou tu Debata

Molo didok mangalului Jahowa ndada na mandok na so tarida Debata, manang na martabuni, manang ‘mago’ Debata. Ai sasintongna ndada jolma parjolo mangalului Debata, alai Debata do na parjolo mangalului jolma “Luluanku ma na mago i, jala mulak boanonku na tardempar i..” ( Hes 34:16) alai molo didok dison mangalului Jahowa, ima pahombarhon ngoluon tu lomo ni roha Debata. Boi do ala ni angka parungkilon namasa di ngolu ni jolma gabe ditundalhon ibana Debata, manang gabe ndang dihaporseai Debata na tuk paluahon ngoluna, gabe hagogoon na asing na haporsea i. Tu angka na songon i ma naeng togihononna asa mangalului Debata jala tongtong joujou tu Debata. Jadi mangalului Debata dos lapatanna mulak tu Debata, mulak manghaposi Debata, jala na tongtong pasahat diri tu Debata. Ai tung songon dia pe angka na di portibon alai na pasti : Dengganan marhaporusan

tu Jahowa, asa marhaposan tu jolma. Dengganan marhaporusan tu Jahowa, asa marhaposan tu angka raja. ( psalm 118:8-9). Ternyata adong do kepastian di ngolu ni angka na porsea na joujou dohot na mangalului Jahowa ima : dialusi jala ditangihon Debata do ibana. “Hulului do Jahowa, jadi dialusi ahu, jala dipalua ahu sian angka hagogotanku sudena” jala diayat 7 didok “Joujou do na dangol on, gabe ditangihon Jahowa, jala dipalua do ibana sian hagogotanna sudena”. Molo tu portibion hita joujou manang mangalualu belum tentu dope dialusi, apalagi ma diurupi. Hape tu Debata adong jaminan dilehon : Dung i joujou ma ho, jadi alusan ni Jahowa ma ho; molo angguhangguk ho, gabe dohononna ma: Ida ma, dison do ahu!( Jes 58:9) Nuaeng persolanna; olo do jolma mangalului jala joujou tu Debata? Binsan dilehon Debata kesempatan ingkon naeng pangkeon ni jolma laho mangalului Debata. Sai lulu i hamu ma Jahowa, binsan tarbahen dope jumpang ibana; jou hamu ma ibana, binsan jonok dope ibana ( Jes 55:6). Manongtong ma hita mamuji Debata, ai pardenggan basa do ibana, jala na so marpasohotan do asinirohana sudena. Amen

 

Bahan Diskusi :

1.    Angka dia ma na mambahen ngolunta mabiar di partingkianon, jala molo ro biar tu ise do hita mangalualu?

2.    Songon Dia ma hataridaan ni ngolu na mangalului dohot na joujou tu Debata dipartingkianta sinuaengon?

 

Pdt. Janti D. Nababan Pendeta HKBP Resort Desa Gajah