Jamita : Psalmen
125:1-5
NUNGA DENGGAN SALUHUTNA DIBAHEN
JESUS
Jotjot do di jamita dipatubegehon 2 sifat ni jolma,
ima angka na burju marroha dohot angka na jungkat marroha. Dipajojor do angka
sifat-sifat ni jolma sian na 2 horong i. Dipatorang do muse angka dalanna,
pangalahona, ulaonna dohot angka jambar sijaloonna. Di turpuk on pe dipatorang do sifat ni angka na marhaposan di Jahowa, songon dolok Sion, na kokoh, dang humordit, jala hot rodi saleleng ni lelengna. Di
sude pergantian cuaca, musim, hot do hajongjongan ni dolok Sion. On ma gombaran
ni angka na marhaposan tu Jahowa. Godang
do angka na mangarongom ngolu ni angka na marhaposan tu Jahowa, tantangan tu na
porsea, godaan na manait roha ni na porsea i, asa manadingkon haporseaon na sintong.
Nang pe godang angka na “menggoda” na porsea i, alai
sai hot do ibana manghaporseai Debata. Dirajumi
angka na porsea do, bahwa Debata sai
tongtong do manghaliangi angka na ni
asianNa. Tangan ni Jahowa manjaga na porsea i
asa unang laho pingkiranna tu hageduihon. Marhite pangaramotion ni
Debata, tangkas do diboto parpsalmen, bahwa hajahaton ingkon talu maradophon
angka na tigor. Jala angka dalanna pe sai tongtong do diramoti Debata. laos i do tangiang ni marhaposan tu
Debata, sihol do rohana asa tangan ni Jahowa tongtong mandongani langka
langkana.
Sai bahen ma na
denggan ale Jahowa, tu angka na denggan roha
i… on ma pangidoan ni angka na porsea i, anggiat tongtong Debata manumpak di ngolu ni angka na porsea dohot angka
orang orang tulus. Jotjot do hita mangadopi angka tantangan na boi manaiti
rohanta. Sebagian jotjot do manadingkon haporseaonna, laos manimbil mangihuthon
angka tahi ni parjahat. Tarlumobi ma angka sundut na umposo, godang do na
terlena mangihuthon hagiot ni portibi
on, hamajuon ni jaman dohot angka pangalaho na matorbanghu, mangulahon angka hagiot na
mambaen sonang dirina nang pe holan parsatongkinan. Di
ujungna, angka na boi dikuasai hagiot ni portibion, ingkon tu panolsolion ma
ujungna, penyesalan selalu datang terlambat.
Asa unang sanga tarlambat, ringkot ma angka himbauan tu angka na porsea asa
marsihohot, tu angka na gale marroha asa mulak manadingkon hageduhonna. Memang
godang do angka naung sanga mangolu di bagasan hageduhon, maol mulak molo
ditogu, manang sogo rohana molo dipaingot. Bahkan mangalo angka hasintongan
marhite angka pangalaho na so perduli tu hata ni Debata, malas tu angka ulaon
na denggan bahkan sebagian bangga di angka pangalaho na jungkat. Memang jotjot
do taida angka jolma siulahon hajahaton, songon na denggan parngoluonna, mamora
di arta, sangap jala gok angka jolma menghargai dohot menyanjung ibana. Alai di
ujungna, torop do angka siulahon hajahaton i, menyesal dungkon matua, jala dang
adong kebahagiaan di ujungna.
Hita angka naung mananda asi ni roha ni Debata, na
tardok angka jolma partigor, dison ma hita tarjou asa marsihohot marhaporseaon,
songon dolok Sion, nang pe godang angka tantangan na mansai balga situtu na
ingkon taadopi. Di ragam ni tantangan na borat na taadopi nuaeng, tantangan ni
ngolu, parhepengon, kesehatan dohot problema keluarga, ringkot do hita
marhaposan tu Debata. asa tangan ni
Debata ma na mangalinggomi , manghaliangi ngolu ni angka na marhaposan tu
Debata. Nian dang segampang manghatahon, molo ro angka na borat i tu hita.
Adong respon na marragam di angka na mangadopi ragam ni hamaolon.na deba
mambahen tudos tudos
tu kantang, tolor
dohot kopi (gombaran ni roha
ni jolma) na dicampur dohot air panas (masalah na ro). Kantang di rebus
air panas, berubah gabe, lembek, gombaran ni jolma na mangadopi sitaonon laos
mandele, mandate laos gale. Tolor direbus air panas, gabe keras, gombaran ni
jolma na gabe koras rohana, mengandalhon gogona, molo ro angka hamaolon i. Na
parpudi, kopi na tercampur ai panas, mambaen
kopi gabe tabo inumon, ima gombaran ni jolma na boi mardame, mangadopi hamaolon
alai dang mandele, manang
mengandalhon hagogonna, justru mangido pangurupion ni Debata mangalinggomi ngoluna. On ma angka na
marhaposan tu Jahowa, songon dolok Sion, na marsihohot nang pe gok angka
hamaolon i diadopi.
Jamitanta on, manosohon tu hita, asa tongtong ma hita
marhaposan tu Jahowa, marsihohot songon dolok Sion, nang pe torop angka ancaman
ni ngolunta. Unang laho tangan ni partigor tu angka hageduhon, tertarik mangulahon angka hajahaton.
Martangiang ma hita molo adong angka hamaolon i, unang
manimbil tu dalan na roa, unang terjadi angka penyesalan di ari parpudi. Amen.
Bahan Diskusi
:
1. Aha ma
sipatupaonta asa hot marhaposan tu Tuhan i, atik pe ragam parsorion taadopi?
2. Ndung tabege
panorangion ni Jamita on, boha do sikapta dohot panindangionta patupa songon na
nidok ni Topik nunga denggan saluhutna dibahen Jesus.
Pdt. Patar Hutagalung, S.Th. Pendeta HKBP Resort Hutabaru
Tidak ada komentar:
Posting Komentar