MINGGU 31 MARET 2024 (PASKAH I) MARLAS NI ROHA MIDA HATUAONNA I (JESAYA 25:6-9)

 

MINGGU 31 MARET 2024 (PASKAH I)

MARLAS NI ROHA MIDA HATUAONNA I (JESAYA 25:6-9)

 

Patujolo:

Lagu Buku Ende No. 96 "Nunga talu hamatean dibaen Tuhan Jesus i. Ai na hehe do Ibana songon na nidokNa i. Haleluya, Haleluya, nunga hehe Jesus i. Haleluya, Haleluya nunga hehe Jesus i", lagu on nunga jotjot taendehon molo jumpa Ibadah Paskah. Hatutubu - Hamamate Haheheon ni Tuhan Jesus ima sada kesatuan na so boi tarsirang. Molo holan barita Hatutubu ni Jesus do dibaritahon ndang adong barita hamamate dohot haheheon ni Tuhan Jesus ndang singkop ma misi ni Jesus ro tu portibion. Manang molo holan barita hatutubu dohot hamamate ni Tuhan Jesus do dibaritahon ndang adong haheheon ni Tuhan Jesus, rumar ma jamita ni parbarita nauli dohot rumar ma haporseaon ni angka jolma (band. 1 Korint 15: 14). Santo Tomas Aquinas ima sahalak teolog, filsuf dan Frater di Dominikan Italia, ia berdoa "Kristus, Kasih-Mu adalah sekuat api dan semanis madu. Sebab itu jikalau jiwaku berpisah dengan segala sesuatu yang ada di dunia ini, biarlah aku berpisah demi kasihku kepada-Mu, kepada-Mu, Kristus, yang telah berkorban di salib karena kasih-Mu kepadaku. Amin". Manghilala do ibana di holong ni roha ni Jesus, pola mate Jesus manaluhon hamatean i, nunga dipasuang Jesus hangoluan, hasonangan tu saluhut jolma i.

 

Hatorangan ni Turpuk:

Terbagi 3 bagian do buku Jesaya ima proto Jesaya (Bindu 1-39), deutro Jesaya (Bindu 40-55), trito Jesaya (Bindu 56 - 66). Alani masuk tu proto Jesaya ma turpuk on. Ima na mamaritahon gogo dohot huaso ni Debata na so hatudosan. Laos dibaritahon do di turpuk on salpu do saluhut harajaon di portibi alai harajaon ni Debata hot ro di salelenglelengna. Di ayat 6 i didok do". jadi padirion ni Jahowa Zebaot ma di saluhut bangso sada haroan di dolok on, haroan na talmis, haroan sian tuak anggur naung leleng, sian sipanganon na hojal, sian angka anggur na galia na pita" martudutudo do pandohan on tu Jerusalem na imbaru na diparade Debata ima sambulo ni tondinta. Laos Debata i sandiri patupaon "haroan na talmis" ima pesta bolon hamonangan ni Jesus manaluhon hamatean, marhite na mate Jesus di hau pinorsilang. Di ayat 7-8 "Dung i pasisionNa ma di dolok on hirehire na hinuphuphon tu saluhut angka bangso dohot panghuphupi na hinuphuphon tu saluhut angka parbegu. Bondutonna ma hamatean salelenglelengna jala apusan ni Tuhan Jahowa ma iluilu sian nasa bohi, jala padaoonNa ma haurahon ni bangsoNa di sandok tano on, ai nunga Jahowa mandok i" naeng mandok ima Debata i sandiri pasisihon hamatean, parungkilon manang habot ni roha sian angka jolma. Laos on ma sintuhu ni Paskah. Nunga ditaluhon Jesus be hamatean i, nunga dipasuang Jesus be hangoluan, hasonangan tu saluhut jolma. Patut ma jolma mandok mauliate tu Debata. Haleluya, Haleluya ima na ingkon suan di roha ni angka jolma.

Ayat 9 "Jadi dohonon ni halak ma di ari na sasada i: "Ida ma on do Debatanta, na itahaposi, na mangurupi hita; dison do Jahowa na itahaposi. Marolopolop ma hita jala marlas ni roha mida hatuaonNa i." On ma respon ni angka jolma naung manghilala holong ni roha ni Debata (ayat 6-8). Ingkon marolopolop ma angka jolma i ala nunga ditaluhon Jesus be hamatean i, nunga dipasisi Debata hirehire i, jala apusan ni Debata iluilu sian nasa bohi dohot padaoonNa ma haurahon ni bangsoNa sian tano on.

 

Penutup

Di Minggu Paskah on disoarahon jala dijou do tu hita asa Marolopolop, i do naeng di sungguli di turpuk on. Ala naung tadai, tahilala do denggan basa ni Debata. Ala nunga tubu - mate - jala hehe Jesus Kristus. Boi do marhite 2 hal jolma i marolopolop; ala ni portibi dohot ala ni Tuhan i. Molo ala ni portibi do jolma marolopolop bersifat terbatas do i. Alai molo marolopolop jolma i ala Tuhan, hot do ro di saleleng ni lelengna. Selamat Paskah! Amen