Jamita Epistel : Rom 1:16-17 HALAK PARTIGOR I MANGOLU DO

 

Jamita : Rom 1:16-17

 

HALAK PARTIGOR I MANGOLU DO

 

Huria ni Tuhanta...Adong do angka na masa di ngolu on na maralo tu roha jala mangihuthon pangantusion ndang saurdot dohot hata ni Debata manang nilai-nilai hakristenon, alai laos pinasombu songon i ala ni losok ni roha manang biar ni roha. Hape aut sura rade roha jala ndang mabiar laho paubahon manang paimbaruhon, tung mansai uli panghorhonna di parngoluon dohot di masyarakat na humaliang. Isara ni parjujion, Togel, Parmabuhon sude do umbotosa na tung manegai di ngolu ni masyarakati, Alai godangan sip manang ndang parduli jolma paidaida hajahaton i manegai ngolu ni jolma. Mansai ringkot do gogo dohot habaranion laho paubahon angka na so denggan jala na maralo tu hata ni Debata dohot nilai-nilai hakristenon. Ido na tangkas dipatuduhon Dr. Martin Luther di tingki mamuhai gerakan pembaharuan gereja di abad XVI i. Nunga sai dipaidaida ibana na masa di huria hatiha i. Nunga diida ibana pangajarion naung manimbil sian hata ni Debata. Nunga diida ibana naung jotjot huria i mangaliluhon halak Kristen. Godang do angka jolma naung marnida i alai ndang marhabaranion manghatahonsa.

Huria ni Tuhanta...Tarbarita do surat ni Apostel Paulus tu Huria Rom sada surat na marasihon teologi ni Apostel Paulus na tung bagas paandarhon hasintongan ni Debata na gabe sipeopon jala sitiopon laho pahembanghon pangajarion dogma hakristenon. Dr.Martin Luther sandiri godang do manurat taringot tu buku Rom on jala marojahan tu surat ni Apostel Paulus on manghatindanghon hasintongan taringot tu asi ni roha ni Debata dohot taringot tu haporseaon na gabe ojahan manang pilar ni gerakan reformasi. Ndang huhailahon Barita nauli i. Dung pajumpang si Saulus (na gabe digoari Paulus) dohot Tuhan Jesus di pardalanan tu huta Damaskus na mamboan haimbaruon di ngoluna: sian silelei Kristen gabe sahalak Kristen na tutu, sian naso mananda Jesus, gabe naposo haposan ni Kristus,

lam imbaru do ibana sian tingki tu tingki. Tung tangkas do dingolu ni Apostel Paulus, raphon Kristus sai lam imbaru do gogo, huaso, habisuhon dohot las ni roha mandalanhon ulaon pamaritahonon taringot tu hasesaan ni dosa, haluaon dohot hangoluan ala ni asi ni roha ni Debata. Ala ni i tu dia pe ibana mangalangka, aha pe na masa tu ibana, tung pe ingkon di hurungan ibana, tongtong do di bagasan huaso, gogo dohot las ni roha ibana manghatindanghon taringot tu Kristus i. Ndang hea dihailahon ibana barita nauli i, ai tangkas do diboto ibana: Hagogoon ni Debata do i paluahon nasa na porse tu kekuatan Allah yang menyelamatkan orang percaya.

 

Huria ni Tuhanta...Patar do Hatigoran ni Debata (nyata) kebenaran Allah. Ingkon patar ma tarida hatigoran ni Debata, i ma ulaon asi ni rohaNa marhitehite Jesus Kristus. Hatigoran ni Debata ndada taringot tu namangulahon patik songon nirajuman ni halak Jahudi. Ndang patik i be na gabe hatontuan manang boi tolhas hatuaon dohot haluaon i tu sasahalak manang ndang. Alai, asi ni roha ni Debata do na paradehon hasesaan ni dosa, haluaon, dohot hangoluan na salelenglelengna. Asi ni roha ni Debata do manontuhon hasasaut ni sangkapNa di bagasan ngolu ni sasahalak. On ma na tangkas taida di gerakan reformasi gereja marhite pandohan ‘Sola Gratia’ sada sian pilar reformasi gereja, raphon Sola Fide dohot Sola Scriptura.

Partigor mangolu hinorhon ni haporseaonna orang benar akan hidup oleh iman. Haporseaon i do na rumingkot. Ala ni haporseaon ni sasahalak hinorhon ni asi ni roha ni Debata do umbahen gabe pintor jala gabe partigor ibana. Ndang partigor sasahalak molo so porsea ibana di asi ni roha ni Debata na paluahon marhitehite Jesus Kristus. Alai, ala porsea ibana diasi ni roha ni Debata gabe pintor ma ibana. On ma na tangkas taida di gerakan reformasi marhite pandohan Sola Fide sada sian pilar reformasi gereja, raphon Sola Gratia dohot Sola Scriptura. Hasintongan songon na tarsurat di Rom 1:16-17 on do na tung tangkas dipaandar jala naeng bagas antusan ni ganup halak Kristen. Didok Marthin Luther taringot tu hatigoran ni Debata, na tung maol diantusi ibana jala na mambahen ibana marungkil jala marsak i ma taringot tu lapatan ni “hatigoran ni Debata.” Angka parpande bisuk tingki i mangalapati jala mangajarhon ia hatigoran ni Debata i ma: tingkos do Debata manguhumi pardosa dohot na so partigor. Pangantusion on ma na tung diparungkilhon Dr. Martin Luther. Dirajumi ibana do dirina pardosa jala ndang tigor. Alai sai dirimangrimangi ibana ma hata i arian dohot borngin i ma hata

ni Debata na mandok, “hatigoran ni Debata na sian haporseaon tu haporseaon- na mangolu do partigor i hinorhon ni haporseaonna.”

Di bagasan partingkian sisaonari on,olo do mago haporseaon ni jolma. Gari tahe pangalapation taringot tu hadirion ni huria pe jotjot na tung dao sian hasintongan na tarsurat di Buku na badia i. Ala ni i, tung mansai denggan mulak hita tongtong muse tu hata ni Debata, ima hasintongan napatar tarida diturpuk on.

 

Bahan Diskusi:

1.      Tahaporseai dope asi ni roha ni Debata na mandongani hita sahat tu tingki on? Angka dia ma asi ni roha ni Debata na tapanghilalahon di ngolunta?

2.      Boasa bangkol rohanta mandok, dohot mangulahon hasintongan di ngolunta siganup ari?

Pdt. Etjen Lumban Gaol, M.Div. Pendeta HKBP Resort Sei Apung