Jamita Epstel : Markus 10:46-52 GURU DOK NI DEBATA DO SALUHUTNA

 

Jamita : Markus 10:46-52

 

GURU DOK NI DEBATA DO SALUHUTNA

 

Ganup halak pasti do adong panghirimon dibagasan ngoluna, nang songoni hita ganup marsadasada. Panghirimon boi do asa marhangoluan na denggan, marpangkat manang asa marjabatan na denggan, relasi na denggan dohot lan angka na asing. Diturpukta sadarion dipatuduhon do sahalak na mapitung na margoar Bartimeus (lapatanna Ianakhon ni si Timeus) na manghirim ibana asa buha nian simalolongna. Ibana sahalak anak na mapitung sian bapa na tong mapitung, na mambahen ibana gabe lam marungkil, alai lobi sian tingki parmalumna na patuduhon tanda holongangan.

Bartimeus sahalak na mapitung, namanehenehe dipinggol ni dalan, mangido asi ni roha sian angka halak na mamolus. Alai adong hal na istimewa sian si Bartimeus, ndang jolma sigurbak ulu ibana, na so olo mula ulaon. Adong do di ibana panghirimon na boi do buha simalolongna di tingkina. Boha amang/inang, palobi hu panghirimon na i? Sambolus sai hira napalobihu do panghirimon ni ibana. Alai ndung bogot Jesus tu Jeriko laho tu Jerusalem, gabe lam manontong ma pangkirimonna.

Barita na bongot Jesus, sahat do tu sipareon ni Bartimeus. Angka hata dohot oraora ndang gabe pamenek rohana. Alai pintor joujou do ibana tu Tuhan Jesus, mangidohon asi ni rohaNa: “O Jesus, Anak ni si Daud, asi ma roham mida ahu!” Pandohan i pataridahon naung adong di rohana boni ni haporseaon taringot tu hadirion dohot huaso ni Jesus. Nunga sar barita taringot tu panghobasion ni Jesus, na boi mangalehon hamalumon tu na marsahit dohot mambuha mata ni na mapitung. Pos do rahana di Tuhan Jesus na boi mangalehon hamalumon disimalolongna, gabe buha jala boi marnida. Parsorion (kesengsaraan) ima na gabe sada tujuan ni asi ni roha i. Ala ni i, sai dipatuduhon ibana do parsorionna asa tubu

asi ni roha di anak ni si Daud, na ditingki dibagabagahon i Ibana, na boi mamuha simalolong ni na mapitung (Jes. 35 : 5). Jadi, molo tapangidohon pangurupion dohot hamalumon sian Jesus i, ingkon idaonta do Ibana songon Mesias na binagabagahon i, silehon asi ni roha dohot pasupasu.

Halak na adong di na humaliang namapitung i, na dimulanai maminsang ibana, nunga gabe balik mambahen gogo di ibana, na margogo do jala marhuaso do Jesus i laho patuduhon asi ni rohaNa tu ibana. Didok nasida:”Pos ma roham! Hehe ma ho! Dijou do ho!”. Jala molo di jou Ibana do ho, malum ma ho. Taida ma gonghon dohot joujou ni asi ni roha napinasahat ni Jesus i tu hita asa ro hita tu Ibana, ima sada dorongan na tung mansai gogo na laho patubuhon panghirimon, asa hatop hita ro tu Jesus, jala hitape taruli ma diangka naung tarparsitta. Loas ma angka na marsala i, na so manghirimi, na diunjuni, na male, namarsaimara, patoguhon rohana, ala Ibana manjou nasida asa disesa dosana, asa digohi, jala asa diurupi, dipabosur, jala diparabit, laho taruli disude angka naung pinarade tu nasida, hombar tu na ringkot di ganup nasida.

Halak na mapitung i mamintor tibu mangulahon na dumenggan laho manjumpanghon Jesus i; tading do ulosna jala magira di dapothon Jesus (ay. 50). Dipalua ibana do saluhut na boi mambahen mara tu ibana, na boi mambahen ibana madabu, manang na boi mangambati ibana naeng pajumpang dohot Jesus, manang na mambahen gabe lambat langkana. Jadi halak na naeng ro mandapothon Jesus i, ingkon mananggalhon saluhut angka na pasorat ibana, ima ulos na boi mandabuhon ibana (Pat: Heber 12 : 1).

Jumolo do dipangido ibana asa dipamalum Jesus i simalolongna, anggiat tung boi marnida, asa boi ibana mulaulaonna laho dalan ni ngoluna, asa unang gabe sitanggungon manang gabe boban ibana maradophon angka na asing . “Laho ma ho! Dipangolu haporseaonmi do ho. Jala mamintor marnida ma matana..” (ay. 52). Marhite na buha simalolongna gabe boi ma ibana mansari disipanganonna. Boi ma dohonon, haotoon bolon do molo tung ala ni losokna jolma i ndang maruli disipanganonna, na dibahen ibana sandiri gabe mapitung jala pampang. Hape nunga dipasahat Debata tu jolma i pamatang dohot parnidaan na denggan.

Hamu angka dongan sahaporseaon, ndang habilangan be godangna hita martangiang dohot marsomba tu Jesus. Ndang habilangan piga hali be hita manangihon jamita, jala ndang taingot be angka ise namanjamitahonsa. Alai nungga mambahen hamubaon i di ngolunta? Molo ndang dope. Marsiajar ma hita

sian si Bartimeus. Molo pe godang na maminsang ibana ala mapitung, diejek pangidoido jala didok halak pardosa. Alai sudena i ndang mangambati rohana laho pajumpang dohot Jesus. Holan dibege ibana ro Jesus, pintor dihalaputi ibana do joujou tu Jesus. Dipatuduhon do haporseaonna tu Jesus. Sahali pajumpang dohot Jesus taruli las ni roha.

Molo pe salelengon nungga martangiang jala tapuji Jesus jala tabege godang jamita. Marhite turpuk sadarion disosoi do hita saluhutna asa pajumpang hita dohot Jesus unang ala ni hasomalan sambing, alai marhite haporseaon ma. Ro ma hita tu Ibana marhite haporseaon, dung i tapanghilalahon ma asi ni rohaNa sa so tarasam i.

Ndang arta, jabatan di pangido si Bartimeus, alai simalolong na buha do dipangido. Marsiajar ma hita sian si Bartimeus, nang pe mapitung secara fisik, alai diida ibana do Tuhan i marhite haporseaonna. Pangido ma tu Jesus na ringkot dingolum. Ai “GURU DOK NI DEBATA DO SALUHUTNA”. Amen.

 

Bahan Diskusi:

1.      Aha do naung tapatupa di ngolu on asa boi pajumpang dohot Jesus? Usaha na tapatupa i mambahen lam jonok do manang lam holang tu Tuhan Jesus?

2.      Molo di sungkunhon Jesus ma tu hita sungkun-sungkun songon na tu si Bartineus i. “Aha dipangido raham sibahenonku tu ho?” Aha do alusmu?

Pdt. Pancasona Simbolon, M.Div., M.Pd.K. Pendeta HKBP Resort Mutiara