Psalmen 25: 1 - 10 "Jahowa Pabotohon Angka DalanNa" Jamita Minggu tu Minggu Invocavit, 18 Februari 2024

                           Jamita Minggu tu Minggu Invocavit, 18 Februari 2024

Psalmen 25: 1 - 10

"Jahowa Pabotohon Angka DalanNa"

 

1. Patujolo

 

Secara khusus Psalmen 25 on ima Ende ni si David, na marisi tangiang mangido asi ni roha ni Debata laho mangurupu, paluahon, dohot mangondihon ibana mangadapi sitaonon dohot na hansit di ngoluna. Haluaon sian musu dohot sian dosana ima mangonjar roha ni si David laho martangiang. Molo nunga ro na dua i tu ngolu ni Jolma, maol do jumpang hasonangan jala boi do mambahen gale haporseaon. Ala ni i marhite tangiang pangidoan i, tarida do pangidoan ni si David na marsitutu tu Debata asa dipalua ibana sian musu nang dosana sandiri. Tangiang i pe borhat do sian perenungan na bagas dohot panghilalaan na balga di pangurupion ni Debata. Ido umbahen di Psalmen 25 on, dihatindangkon si David holan Debata do na tuk paluahon ibana.

 

2. Hatorangan Turpuk

 

Adong tolu bagian na penting pinataridahon ni raja David di turpuk on, Ima:

 

1. Debata do na Paluahon (1-3)

 

Di hatindangkon si David do "Ho do Ale Jahowa dihalungunhon rohangku" "marhaposan tu Ho do ahu" "Dang tarurak angka na manghaposi Ho". Ayat 1-3 on ima patuduhon pos ni roha dohot balga ni panghirimon di pangurupion dohot haluaon sian sitaonon na masa tu ibana. Disi ma tarida hibul ni roha ni si David na pasahathon hadirionna tu Debata di sitaonon nai. Dang tarida disi ganggu ni loha, baliksa tarida do togu ni paghirimon di huaso ni Debata na tuk paluahon ibana. Di ayat 3 didok dang jadi marsuraksurak angka musuna mida si David, jala maila do sogot angka pangose soada Alana. Musu ni si David na di maksud dison ima si Saul dohot halak Pilistim na manghasogoon ibana ala tarpillit ibana gabe raja. Dipangidohon si David do marhite tangiangna asa Debata na mamillit ibana gabe raja, ima na mangurupi jala paluahoon ibana. Naeng patuduhon, hataridaan ni na mamillit do na pinillit. Na marlapatan hataridaan ni Debata na mamillit si David do si David. Manang ise na martahi na jat tu na niasianNa, Debata sandiri do mambaloshon dohot patupahon hamagoan tu nasida. Ima pos ni roha ni si David tu Debata na mamillit Ibana. Alani dipasahat si David do hadirionna tu Debata na tuk paluahon.

 

2. Jahowa Debata na Patuduhon Angka DalanNa (4-7)

 

Di ayat 4 dipangidohon si David do asa dipatuduhon Debata Jahowa dalanNa. Dalan na nidok na dison ima bisuk dohot pangajarion ni Debata. Ima dalan hasintongan na mamboan tu hangoluan dohot haluaon tu angka na marhaposan tu Ibana (ay.5). Panghaporseaon dohot pos ni roha ni si David tu Debata, ido na mambahen ibana parorothon dirina tu ampuan ni Debata. Rade do ibana manjalo pangajarion ni Debata tu dirina. Dang dirina manang gogona na di pagasahon si David. Alai pangajarion ni Debata do na di pangasahon ibana di sitaonon na i. Di ayat 6-7, dirajumi si David do tung na mansai gale do ibana di sitaonon na, jala di rimangi ibana angka hasalaanna di adopan ni Debata naso tama mangido pangurupion tu Debata Jahowa. Dibahen i dibagasan unduk nang serep ni roha jou-jou si David tu Debata di asi ni roha ni Debata. Dipangido si David do asa disesa dosana, jala dipangido ibana asa diingot Debata ibana marhite asi ni rohaNa. Na pos do rohani parpsalmen marhite panandaioan na tangkas tu Debata, pardenggan basa jala parasiroha do Debata, jala naso tupa muba jala lupa Ibana di asi dohot denggan basa ni Debata. Parasiroha jala pardengganbasa ima sada karakter ni na melekat tu diri ni Debata. na sai tongtong patuduhon asi ni rohaNa tu angka pardosa, jala na sai tongtong patuduhon dalan tu angka na manjou Ibana (Psalmen 37:5).

 

3. Debata na Satia di hasintongan dohot Angka DalanNa (8-10)

 

Panandaion ni si David tu Debata dang holan mananda Debata pardenggan basa, alai na mananda do ibana di Debata parasiroha huhut na sintong jala bonar do angka dalanNa. Dipatudu Debata do uhum dohot dalanNa tu angka jolma na dangol dohot na tarjepol (orang yang sesat dan rendah hati). Hata “diparnonohon” di ayat 9, na marlapatan dang holan patuduhon angak uhum dohot dalanNa, alai jumolo do Ibana mangulahon. Di ayat 8-10 adong sampe opat hali didok "dalan ni Jahowa". Na marlapatan dalan ni Jahowa ima: lomo ni roha, sangkap, patik, uhum dohot hadirion ni Debata, na hot jala manontong (dang mubauba alani situasi). Ido na mambahen tung mansai pos situtu si David di Debata na tuk paluahon jala mangajari Ibana mangadopi sitaononna.

 

III. Panutup

 

Marhite ende na marisi panindangion ni si David di bungku Psalmen 25 on, naeng ma sude halak na porsea tontong marpos ni roha jala marpanghirimon tu Debata. Mangido pangurupion jala mangihuthon dalan ni Debata. Di ajarhon do hita songon si David di tingki mangadopi angka sitaonon asa tongtong jou-jou tu Debata. Hombar tu goar ni Minggunta ima Minggu Invocavit na marlapatan "Jouonna ma ahu, alusanku ma Ibana". Joujou ma hita tu Debata, jala sai tiggil ma hita di angka dalan ni Debata. Tarlumobi uju masa angka sitaonon di bagasan ngolunta, ta pangido ma dalan nang pangajarion sian Debata. Ai Ibana do na tuk mangurupi hita. Jala sian Ibana do ro angka pangurupion. Ai Pardenggan basa jala na bonar do Jahowa. Dang pasombuonNa hita sasadasa mangadopi sitaonon. Alani i ta haposi ma Debata jala rade ma hita mangihuthon dalanNa “Ai Jahowa do pabotohon angka dalanNa". Amen.