Jamita Partangiangan : Lukas 9:22-27 AI DENGGAN DO UHUM NI JAHOWA TU HO

       Jamita : Lukas 9:22-27

 

AI DENGGAN DO UHUM NI JAHOWA TU HO

Hita angka na hinaholongan ni Tuhanta Jesus Kristus !

Dibonai do turpuk Epistel on marhite na pabotohon taringot tu sitaonon ni Anak ni Jolma i, dung tangkas dihatindanghon sisean ni Tuhan Jesus marhite panindangion ni si Petrus, paboa Ibana do Kristus Mesias na sinuru ni Debata. Godang do taononNa, bolonghonon ni angka panungganei, sintua ni malim dohot sibotosurat do Ibana, dung i dipusa jala mulak mangolu di ari patoluhon. Jala nasa na mangihuthon Tuhan Jesus, ingkon rade ma ibana marsitaonon, songon Tuhan Jesus naung marsitaonon jala sahat tu na agoan hosa. Asa ndang cukup holan marpanindangion taringot tu ise do Tuhan Jesus i, alai ingkon do diboto aha do tujuan haroro ni Tuhan Jesus ro tu portibi on. Angka uhum na denggan do na disangkapi Debata tu hita jolma na di portibi on, umbahen na ro Ibana, marsitaonon, agoan hosa Ibana, mate dipusa angka panungganei, sintua ni malim doht sibotosurat, alai mulak mangolu di ari patoluhon, asa dapotan hangoluan do hita angka na porsea di Ibana.

 

Dipodahon Tuhan Jesus do muse di turpuk on, molo adong do syarat tu angka na naeng dapotan haluaon i, ima ingkon rade ma ibana mansoadahon dirina, manuhuk hau pinarsilang na tu ibana, jala mangihuthon Ibana (ay 23). Ise na naeng paluahon hosana, ninna Tuhan Jesus, i do na agoan hosa. Sabalikna, ise na agoan hosa alani Ahu, i do na paluahon hosana” (ay 24). Aha na nilehon ni portibion ndang boi paluahon jolma i sian hamatean. I do umbahen didok Tuhan Jesus “Ai aha ma gunana di jolma nang nasa portibi on diomo, anggo diago dirina, laos mago disi? Halak naung mangihuthon Tuhan Jesus, ndang mabiar be agoan hosa alani Tuhan Jesus. Nang pe ingkon pailaon ni portibi on hita ala siihuthon Jesus hita, alai baliksa pailaon ni Debata do muse nasida angka naung paburuburu jala na mangarehei hita, di na ro Ibana dohot Ama i raphon angka surusuruan na badia i. Alani ingkon na tongtong do hita satia mangihuthon Ibana, nang pe ingkon mangae angka hamaolon, manuhuk silang jala mansoadahon diri.

Hampir sude jolma do mabiar agoan hosa. Alani, sai marusaha do jolma laho paluahon dirina marhite na manjamothon ngoluna asa unang agoan hosa. Hape di sisi na asing, sai torus do hamatean (na gabe upa ni dosa) maotaot (mengintai) sude jolma, ala nasa jolma do ingkon mate. Antong, boha do bahenonta asa boi hita paluahon hosanta, jala unang agoan hosa hita? Marhite turpuk on didok do molo holan marhite Jesus do hita boi paluahon hosanta. Asa marhite hamamate dohot haheheon ni Tuhan Jesus gabe dapotan haluaon dohot hangoluan ma hita angka na mangihuthon Ibana.

 

Bahan Diskusi:

1.      Aha do lapatanna mansoadahon dirina; manuhuk silang na tu ibana laho mangihuthon Tuhan Jesus ?

2.      Nunga be taihuthon Tuhan Jesus hombar tu syarat na didok Tuhan Jesus di bagasan turpuk on, ima: mansoadahon diri dohot manuhuk silang na tu hita?

 

Pdt. Natalina Nababan, S.Si. Pendeta HKBP Resort Kisaran II