Jamita Epistel Mateus 15;1-9 MANGARADOTI TONA NI JAHOWA

 

 

MANGARADOTI TONA NI JAHOWA

 

Huria ni Tuhanta. Habadiaon marsasahalak (kesalehan pribadi) tung ringkot do dihangoluhon ganup jolma. Tuhanta i pe mandok: Badia ma hamu, ai na badia do Ahu (1 Petrus 1:16). Habadiaon ima sada hataridaan ni Halak na porsea. Habadiaon tung so boi do patupaon gabe batu partuktuhan tu angka dongan jolma, ndang sihaginjanghonon ni roha songon hata na somal tabege: kesombongan rohani. Habadiaon tung so pangkeon doi gabe dalan masipangomoan portibi tu diri sandiri. Sabalik na tahe habadiaon i gabe sada panogunoguon, tiruan tu angka dongan, lumobi tahe tu angka dongan na gale haporseaonna.

Halak Parise dohot Sibotosurat manghangoluhon habadiaon marhite namangulahon ruhut-ruhut Hajahudion/tradisi. Isara na ingkon jolo mamuri tangan andorang so mangan. Na mardosa do sahalak jolma molo mangan ia so jumolo ibana mamuri tangan na, jala tudos ma ibana tu sahalak na mangulahon dosa pangalangkupon. Tung so olo do Halak Jahudi rap marsipanganon dohot Halak na so mamuri tangan na laho mangan, ai dirajumi do tudoshon binatang (panangga) molo mangan ia so jumolo mamuri tangan na. Angka ajaran-ajaran/paham tradisi Hajahudion on tung mansai gogo do huaso na manirai parngoluon ni Halak Jahudi martimbanghon angka patik ni Debata. Nasida mandok: dumenggan do mate iba sian mangolu hape sai namaralo tu tradisi parangeniba. Tradisi/hasomalan mamuri tangan           on,       dimulanai        diulahon                angka                     malim         di           bagas      joro  laho marhobas/manghobasi. Molo diburi tangan na tontu ias ma ibana di jolo ni Debata. Dungi mangerbang ma ajaran/tradisi on tu tonga tonga ni angka Masyarakat Jahudi. Na borhat do angka Parise dohot Sibotosurat sian Jerusalem paihut-ihut inganan pangulaon ni Jesus dohot angka siseanNa. Haroro nasida ndang ala na porsea tu pangajarion ni Jesus alai naeng padapot/menjebak Jesus do. Didok roha

nasida: atik beha adong ajaran i na maralo tu angka tradisi Jahudi. Di sada tingki tarbereng nasida ma angka sisean i marsipanganon so jumolo mamuri tangan na. hinorhon ni i gabe muruk nasida jala manungkun tu Jesus: “Boasa dilaosi angka siseanMi adat na sian angka natua-tua? Ai ndang marburi nasida laho mangan”. Ay

2. Ndang dialusi Jesus sungkun sungkun nasida on lai gabe sungkun sungkun do na dipatupa Jesus tu angka Parise dohot Sibotosurat i, ima na mandok: “ia hamu boasa laosanmuna patik ni Debata paingotingot adamuna i?. sungkun sungkun ni Jesus on ima laho patuduhon pangalaho ni angka Parise dohot Sibotosurat, na umporluan do nasida mangulahon adat/tradisi sian na mangulahon hata ni Debata. Songon na ringgas idaon manomba Debata alai roha na mansai dao sian Debata (marpangansi).

Didok Jesus marpangansi nasida ala ulaon adat/tradisi dipangke manegai patik ni Debata. Hape sasintong na adat/tradisi ingkon pangkeon laho mangaradoti tona ni Debata. Bnd: BE no 476:3 “Ulaonku nang artangku pangke baen ma sangapMi..d.u”. Ayat 5 “Pinelehon ma tagonan na patut hian pangurupionku di ho,..d.u”. on ma sada poda sian ajaran tradisi Hajahudion i na mansai tangkas manegai patik ni Debata ima patik na palimahon i na mandok Ingkon pasangapon do natoras. Na boi do Halak Jahudi ndang pasangaphon, ndang manarihon ngolu ni natoras na molo nunga dipasahat nasida hepeng na tu bagas joro bahen pelean, dohot alasan: nunga suda hepeng. Ajaran on ima sada cara laho masipangomoan tu diri ni angka Parise dohot Sibotosurat i. Ia angka pelean na dipasahat ni na torop tu bagasjoro ndada na tu Debata dipangke. Angka natoras pe na umboto ianakhon naung pasahat hepeng/pelean tu bagasjoro i tung so boi be mamaksahon angka ianakhon na asa dipasangap, asa diurupi angka ianakhon i ibana.

Huria ni Tuhanta. Habadion marsasahalak (kesalehan pribadi) unang ma tapangke laho manegai angka parsaoran, parpunguan na denggan. Tapangke ma i laho mangaradoti angka ton ani Debata, asa doras pardalanan ni sangkap sangkap ni Tuhan i. Molo so marpangansi (munafik) hita marngolu, tarbahen hita do habadionta i gabe sondang hatiuron tu humaliangta. Badia ma rohanta asa tarulahon hita habadion i. molo angka na jahat di rohanta sai na hajahaton do na haluar sian hadirionta.

 

Bahan Diskusi :

1.      Dia do na gumodang, na umbalga taula, taradoti: ulaon adat/tradisi do manang patik ni Debata?

2.      Boasa ma sipata hita jolma, gabe olo umbiar tu adat/tradisi na pinunga ni jolma martimbanghon tu patik ni Debata. Isarana: patik paopathon disuru do hita laho pabadiahon ari minggu i, jala diorai mangula ulaon dinasadari i. hape gabe so marminggu hita ala adong ulaon adat saurmatua/na monding.

Pdt. Alboin Tambunan, M.Div. Pendeta HKBP Resort Tanjung Leidong