Jamita : Lukas
21:1-4
MANGALEHON NANG PE HURANGAN
Huria
ni Tuhanta…Mansai arga do diadopan
ni Debata pelean ni Boruboru na mabalu i, ala sian bulus ni roha jala sian
hahuranganna do ibana pasahathon. Marasing do sian pelean ni na mora i ai
sasude nasida sian lobilobinasida be do di dabuhon hape ia parompuan na mabalu
i sian pogosna i do didabuhon sasude na pineopna i. Marhite turpuk jamita on
asa diajari do hita laho pasahathon pelean ( Persembahan ) tu Debata dibagasan
bulus ni roha dohot unduk ni roha mangalehon pelean tu adopan ni Debata.
Marhite i, tanda ma hita angka na porsea na manghatindanghon di ngolunta nasa
na adong dihita i ma silehonlehon ni Debata sambing tung so adong ala ni
gogonta tung holan ala asi ni roha do. Molo tabereng do diturpuk jamitaon
songon dia keadaan ni boruboru na pogos i, holan i na ma hepengna, hape
dipasahat do i gabe peleanna tu adopan ni Debata dibagasan bulus ni roha dohot
unduk ni roha.
Mansai torop dope ruas hurang
mangantusi lapatan ni Pelean (Persembahan) i nang pe naung leleng gabe
ruas ni huria. Hape pelean (persembahan). Ima pasahathon hamauliateonta tu
Debata marhitehite naung jumolo Debata pasahathon tu hita songon na nidok ni
Endenta B.E No. 204 : 2 “NDANG TADINGHONONHU HO” BL.73, “Nasa na nilehonMi,
tondi ro di pamatanghu. Hosa dohot
gogongki, ro di saluhut artangku. Hupasahat
i tu Ho, na so unsatonhu do.” Mansai tangkas
do endenta i patuduhon Teologi Persembahan na pabotohon tu hita sude na
adong di hita i ma silehonlehon ni Debata.
Huria
ni Tuhanta…Marhite turpuk jamita on dipaingot do na mora nang na pogos asa
tangkas pasahathon na adong di Ibana holan tu Debata jala laos songon I do na
mora i ingkon ongkuhonon ni nasida do nang pe mamora nasida
nda tung alani
gogona
nasida boi mamora alai tung ala silehonlehon ni Debata do nasida boi mamora.
Mansai torop dope na mora nang na pogos ruas ni hurianta hurang mangantusi taringot
tu Teologi Persembahan on. Godang dope pasahathon peleanna holan sekedar pasahathon ndang
sian parsitutuon manang sian bulus ni roha.
Turpuk
Jamita on paingothon hita ma laho
pasahathon pelean sian nasa roha, gogo dohot bulus ni roha. Pasahathon pelean
tontu ingkon na nionjar ni haporseaon ma asa
marpanghorhon ma I tu sandok panggulmiton ni ngolunta, sude na adong
di hita sian Debata do
haroroan ni i. Asa sude ma hita ruas ni hurianta marsitutu laho pasahathon
pelean tu adopan ni Debata unang ma marungutungut manang keadaan terpaksa. Asa
gabe sada sitiruon ma dihita pambahenan ni boruboru na mabalu i na pasahathon na adong
di ibana holan tu Debata dibagasan
habuluson dohot unduk
ni roha. Jala tapaholang ma sian dirinta pelean ni na mamora i ala sian
lobilobi na adong do dipasahat.
Molo borhat hita sian pangantusion ni Pelean di Padan na
Robi tangkas do di si bangso Israel
pasahathon Peleanna tu bagas joro i marhite malim Eli, i ma pasahathon angka
patumonaan na niulana tu bagas joro marhite angka pahanpahanan nang suansuanan na ummuli. Jadi di Padan na
robi pe nunga tangkas ditaringoti taringot tu Pelean na hushus i ma angka
pelean na ummuli i do sipasahaton tu Debata manang tu bagas joro i. Dipasahat
nasida sian nasa roha nasida jala dibagasan haporseaon do i dipasahat.
Tarlumobi molo taringot hita tu si Abraham na pasahathon si Ishak gabe pelean
na arga tu adopan ni Debata, i ma ala na unduk si Abraham tu Debata.
Huria ni Tuhanta…Huria na mangolu i ma molo tangkas haporseaon ni ruas i mangolu jala
tarida ma parbue ni haporseaonna marhite pelean na mangolu, Ndada asal
marpelean alai ingkon tangkas do hibul rohana laho pasahathon pelean i. Hape
molo tarajumi do sude ngolunta on diparmudumudu Debata, dilehon hahipason,
sipanganon, parabiton dohot jabunta gabe ingananta hape tasungkun ma dirinta
sadia ma naung tapasahat tu Debata, boha do nunga las roha ni Tuhanta tabahen
marhite Peleanta ? Sungkunsungkun na mansai bagas ma on tu hita sude ruas ni
hurianta asa taauhon ma tu rohanta ganup.
Bahan diskusi :
1. Boha
do hita pasahathon peleanta salelengon secara khusus di parminggu on nunga
hombar hita tu boruboru na mabalu na pogos I manang tudos do hita tu halak na
mora i?
2.
Boha ma
bahenonta mangalehon (pelean)
nang pe hurangan?
Pdt. Luhut Marpaung, M.Th. Pendeta HKBP Ressort Aek Loba
Tidak ada komentar:
Posting Komentar