Ev. 1 Johannes 1:1-2:2 Topik : MARPARANGE DIBAGASAN HATIURON (Kita Hidup Di Dalam Terang)

 Minggu Quasimodogeniti, 7 April 2024

Ev. 1 Johannes 1:1-2:2

Topik : MARPARANGE DIBAGASAN HATIURON (Kita Hidup Di Dalam Terang)

 

1. Patujolo

Lapatan Quasimodogeniti ima sian hata Latin quasi modo geniti infantes manang "songon posoposo naimbaru tubu" di hata Inggris didok: as newborn babies. Marhite on paboahon dung hehe Tuhanta Jesus, 40 ari ma Jesus manguduti ulaonNa andorang manaek tu banua ginjang. Jala molo taparrorahon rumang parminggion dohot parjamitaon sian Minggu Quasimodogeniti sahat tu Minggu Rogate ima minggu minggu haheheon ni Tuhan Jesus. Dipatuduhon Jesus do diriNa tu angka siseanNa dung hehe Jesus. Taboto ma dison pangulaon ni halak naung marnida Kristus na hehe i, marpanindangion do nasida tu halak na so marnida Jesus na hehe i. Teologi haheheon ima mamaritahon Kristus naung hehe i tu nasa bangso dohot angka natinompa ni Debata.

2. Hatorangan Tu Turpuk

Parjolo, papitahon pangajarion naung sinegaan ni angka panurirang pargapgap taringot tu haluaon di bagasan ngolu ni angka na porsea tu Jesus. Panurirang pargapgap i, papeol haporseaon ni angka na porsea I gabe torop ma nasida manadinghon Huria (1 Joh. 2:19).

Paduahon, didok panurirang pargapgap i ndang adong haluaon asing ni na mangulahon patik ndada ala na porsea (pat. 1 Joh. 2:3-4; 5:3).

Taida ma 1 Johannes 1:1-2:2 ditolu panagian.

1 Johannes 1:1-4

Hata Hangoluan

Ay 1. HATA/FIRMAN (Logos, di hata Gorik, Davar di hata Heber) martudutudu tu tona, hata, pandohan ni Debata, ndang boi diida, dipanotnoti, jala dijama (ay.1 patudos tu Joh. 1:1). Na marlapatan HATA i "ndang berbentuk manang berwujud”. Nda holan marhite soara na boi tinangi ni angka Naposo ni Debata, isarana si Musa, si Samuel, dohot angka Panurirang soara ni Debata na pasahathon HataNa nasida. Alai HATA na binaritahon ni Johannes dison ima HATA naung berbentuk jala berwujud, boi diida, dipanotnoti, jala dijama (ay. 1, patudos tu Joh. 1:14). Nunga gabe DAGING HATA i na boi diida mata jala jinama ni tangan, jala martudutudu ma i tu Jesus.

Ay.2-4 hangoluan saleleng ni lelengna do dilehon HATA i (Jesus) tu hita. Boasa? Ala mangolu jala hehe Jesus sian na mate, ndang adong hamatean na manongtong di bagasan Ibana. Opatpulu ari haheheonNa boi ma tahalapati asa pangkeon ni Jesus partingkian i tu angka natorop marnidasa, na tutu do Ibana mangolu sahat tu saleleng ni lelengna. Ngolu na pinasahat ni Jesus na hehe I ima hangoluan saleleng ni lelengna do, hasonangan saleleng ni lelengna do, ndang sangombas. Sada do tujuan ni si Johannes umbahen na dibaritahon on, asa sude manjangkon halalas ni roha on jala dapotan haluaon. Sian i boi ma talapati ulaon sending manang marbarita nauli nda holan asa tumorop do halak na manjangkon halalas ni roha. Sasada Jesus do silehon hangoluan na manongtong i di hita.

1 Johannes 1:5-10

Mangolu dibagasan Panondang ni Debata

Dung didok Jesus silehon hangoluan na manongtong i, dipatandahon ma muse, ia Jesus na hehe i ima Panondang manang terang. Panondang di hata Ibrani yehi 'or martudutudu do i tu panompaon ni Debata di 1 Musa1:3. Jala di hata Gorik Phos martudutudu tu habadiaon ni Jesus songon Panondang ni Portibi on (Joh. 8:12). Asa molo didok, Jesus do Panondang ni Debata ala marharoan sian Debata Jesus na gabe panondang i asa marhite on ma tahalapati pasolhothon dirinta tarlumobi parangenta tu Jesus na olo ma rohanta manjangkon Ibana laho patiurhon pingkiran, parange, nang panghirimonta asa unang sai didondoni angka haholomon i ngolunta.

Ayat 5-10 Dibagasan hatiuron. Nasa na manghatindanghon mangolu di bagasan parsaoran dohot Debata ingkon mangolu dibagasan hatiuron (1 Joh. 1:5-6). Ditompa Debata do na tiur dohot na holom molo mangihuthon barita panompaon ni Debata. Alai diturpuk on, hata na "holom i" angka parange na holom dipaandar do i di ayat 6: pargabus manang ndang siula hasintongan. Halak na mangolu di bagasan hatiuron, patar ma angka dosa na niulana, jala ndang mangotootoi dirina be ibana gabe didok na so pardosa ibana. Halak na olo mangokui dosana, bongot tu hasesaan ni dosa (ay. 7), jala na so mangokui dosana ndang adong hasintongan dibagasan ibana (ay. 8). Panjouon ni Debata asa saluhut angka na porsea i mardalan di bagasan sondang ni Debata, ai disi do patar parsaoranna dohot Debata. Asa unang olo dielaela angka pargapgap, manongtong ma mangolu di bagasan parsaoran na rosu dohot Debata. Manopoti angka dosa, parohon hasesaan ni dosa di hita (ay. 9), jala rade do hasesaan ni dosa di ganup halak na manghalungunhon hasesaan ni dosa i (ay. 10).

 

1 Johannes 2:1-2;

Manjangkon Jesus Pangondinganta dohot Pardenggananta tu Ama i.

Surat Johannes on paboahon tu hita nang pe halak pardosa hita alai sai tong dope madabu hita tu bagasan dosa. Panghirimon di tingki mardosa hita ima holan marhite Jesus Kristus na gabe parhitean di hita tu Debata Ama. Didok si Johannes do Jesus songon "pembela" di hata gorik parakleton na martudutudu tu Tondi Parbadia (Joh. 14:16, 26; 15:26; 16:27) na marlapatan membela orang lain, atau penasihat yang dekat dan suka menolong." Dihalomohon Debata sian hita, ima asa unang mardosa hita. Alai molo pe mardosa hita, adong do pangondinganta di Ama i, ima Tuhanta Jesus. Ibana ma Pardengganan jala padamehon hita, alai ndada holan tu dosanta, alai dohot do tu sude dosa ni portibi on. Dibahen i, molo mardosa hita, mulak ma tu Jesus, ai holan Ibana do dipajongjong Debata gabe pangondinganta tu Ama i. jala rade do di Ibana nasa hasesaan ni dosanta.

3. Aplikasi

a.      Quasimodogeniti, songon posoposo na imbaru tubu paingothon hita songon posoposo di adopan ni Debata. Ndang tabahen posoposo i mangolu jala magodang molo ndang marsigantung tu inangna. Suman tusi do ngolunta, tarlumobi di hamajuon ni zaman dohot ragam ni hamaolon na taadopi di portibion ingkon marsigantung do hita tu Debata Sitolusada i asa mangolu hita.

b.     Panandaon ni posoposo ima na berbasis “panca indera” na pinaandar ni Johannes di turpuk on, ima “huida”, hupanotnoti”, “hujama” pataridahon hasosolhotna tu Jesus na hehe i. Asa tangkas niida, pinanotnotan ma, asa tangkas tinanda, jinama ma, patuduhon tung solhot tu Jesus na hehe i. Hasolhotanta tu Jesus na hehe i padirihon panandaon na tangkas tu Jesus.

c.      Humusor ma hita sian haholomon tu Panondang i. Nunga hehe Ibana sian tanoman (haholomon i), jala panondang do na binoanNa tu hita, na sian Debata.

Sasada Jesus do na gabe pangondinganta dohot pardenggananta tu Ama i molo mardosa hita. Mulak ma tu Jesus molo madabu hita tu bagasan dosa, unang be gabe mandao sian Ibana. Am