DIPATIMBUL DI BAGASAN TUHAN I (Psalmen 20:1-10)

 

Dipatimbul Di bagasan Tuhan i

(Psalmen 20:1-10)

 

Huria ni Tuhanta na hinaholongan di bagasan Kristus Jesus, taparhatutu di bagasan roha ala haporseaonta i, ai jolma na gale do hita jala so boi tuk mangula agia aha hita so ala ni Debata na margogoihon hita. Sipata tung songon na marisuang do sude parulaonta i molo holan gogonta sambing tapangasahon. Tung mansai marlas roha jala marlapatan situtu do sude ulaonta jala marpanghorhon i taetong di bagasan rohanta ala parpangunsandeanta di Tuhan Debata Pardenggan basa jala Parasi roha. Ibana do mambahen sude manjadi. Dipatimbul Jahowa do saluhutna dibagasan Ibana.

Di nasa pardalanan ni par-Psalmen tangkas do dihatindanghon ibana balga ni pambahenan ni Jahowa di Ibana. Marhite turpuk on naeng pinaandar par-Psalmen i tu hita taringot tu tangiang dohot hamauliateon pinasahat tu Debata tu angka panggomgomi. Tangiang i dipasahat angka natorop i asa tung marhatuaon jala marantu angka panggomgomi i mangulahon ulaonna. Tangkas do diboto angka na martangiang i, angka dokdok ni ulaon panggomgomi umbahen gomos nasida marpangidoan jala pasahathon pos ni roha tu Debata (ay. 2-5). Pos ni roha ni pangisi ni bangso i na martangiang tu angka panggomgomi ala panandaion nasida na tangkas di Jahowa. Di hatindanghon natorop i do Jahowa na sai mandongani nang manangihon di nasa tangiang pangidoan nang pangondianon. Ibana do Jahowa na patupahon ragam angka pangurupion jala pangondingon tu angka na manjoujou goar-Na. Jala Ibana do Jahowa Pardenggan Basa dohot Parasi roha na mangasii sude angka na ro jala marsomba tu Ibana.

Jamita na mangolu do na pinasahat ni angka natorop i tu angka panggomgomi. Mangapoi hita tutu asa ingot hita marpangunsandean tu Debata Jahowa sambing. Paingothon hita di panandaion na tangkas tu Debata Jahowa laos huhut pos roha di bagasan Ibana. Jala tongtong hita sari tu angka panggomgomi. Songon panggomgomi huta, huria, masyarakat, nang negaranta on marhite na manangianghon angka i saluhutna.

Sian i antusanta ma tung mansai dokdok to angka ulaon siteaon nasida. Alai ala ni las ni rohanta ro tu Debata manangianghon nasida asa marhatuaon jala marantu anggiat tung margogo nasida mangula ulaonna. Laos tung di bagasan las ni roha nang gogo na sian Debata tung margogoihon angka panggomgomi. Songon par-Psalem i na manghatindanghon denggan basa ni Debata marhite parsitutuon angka natorop na ro jala manangianghon panggomgomi tu adopan ni Debata di bagasan tangiang nasida.

Singkop situtu saluhut angka las ni roha i di bagasan Tuhan Debata Jahowa. Panindangion ma on na mandok ndang dipaurak Jahowa hita nang tadinghononNa hita alai tongtong do Ibana rap dohot hita mandongani hita jala mangurupi hita di nasa sangkap ni roha nang ulaonta. Asa taida ma tangkas dison tangkas ni pambahenan ni Jahowa di hita. On ma las ni rohanta di saluhutna. Jala ndang adong las ni roha gumalga sian las ni roha ala ni Tuhan i. Songon panindangion ni par-Psalmen di tangiang ni angka na torop i, mariaria nasida di bagasan Tuhan i. Di auhon nasida do nasa panumpahion ni Jahowa dohot pangalusionNa sian angka langit habadiaonNa marhitehite angka pangabahan ni hatuaon ni siamunNa (ay. 7).

Hamonangan i ndada holan ala mangasahon “gogo” nang “bostongan”. Taida ma parasingan mangasahon gogo sambing maradophon mangasahon haporseaon. Pinatalu ni ala haporseaon di Debata do nasa na mangasahon gogo. Tangkas angka ondeng dihatahon par-Psalmen di tangiang ni angka natorop i taringot haporseaon laos urdut disi do idaonta hatandian ni angka na porsea di Debata Jahowa, haporseaonna i do sipangasahon ibana. Tutu ima ngolu ni angka na porsea i, etongonna do ia haporseaonna i do na tuk paluahon ibana. Dihatindanghon ibana do tung ala haporseaon na i do na paluahon ibana sian nasa hagogotan. Laos ala haporseaonna i do gabe halak natarpasupasu ibana. Ima panindangion ni angka na porsea.

Disimpuli ni par-Psalmen i do taringot tangiang ni angka natorop i na mandok “Sai tumpahi ma rajai, ale Jahowa, sai alusi ma hami di ari pangalualuannami!” (ay. 10). Sian panimpuli on taida, ai holan Debata Jahowa do mangondihon nasida, tung tangkas diantusi angka natorop i godang ni angka hagogotan i alai dipangasahon nasida do haporseaon nasida i. Laos huhut tongtong do disarihon, diingot, nang diparrohahon nasida angka panggomgomi di nasida, jala songon halak na marposniroha di Jahowa do nasida laos napasahathon ngolu holan di Jahowa sambing.

Saluhutna i do didok dipatimbul di bagasan Tuhan i. Tuhan Jahowa do na patamahon hita. Ibana do paluahon hita jala dibagasan Ibana ro pangurupion i tu hita. Alani i ndang roha diri tapangasahon nasa na sahat tu bagasan ngolunta. Alai taingot ma ala ni Tuhan i do saluhutna i asa boi hita dipatimbul. Dipatimbul Tuhan Jahowa di bagasan Kristus Jesus do angka raja nang panggomgomi. Marsitangiangan di bagasan Krsitus Jesus do angka natorop manangianghon saluhut angka raja, panggomgomi, nang tu angka saluhut bangso nang halak. Umbahen i do, mangasahon haporseaon gabe halak na marposniroha do hita di Tuhan Debata sambing di bagasan Kristus Jesus. Dipatimbul di bagasan Tuhan i.

 

Panurat Jamita

Pdt. Albert J. P. Pasaribu, STh

Pendeta Fungsional HKBP Kisaran Kota