PIR
MA TONDIM, UNANG HO TAHUTAN
Tamba do bilangan ni halak na
tahuton dungkon masa sorimago pandemi covid-19. Na metmet na magodang, na pogos
nang na mora, na di kota nang na di huta, uluan manang na ginonggoman, ganup be
do hita hea tahutan. Alai, tung pe ganup hita hea be tahutan, unang ma tapeop
nasa na margoar hatahutan manang biar, asing ni biar mida Jahowa, singkop ma
roha biar i intap ni manghorhon hamanaton unang bolas hita diboan madabu tu
bagasan rumang ni angka dosa dohot pangunjunan. Atik pe imbaru dope sorimago
Covid-19, alai ndang na imbaru be ngolu na tahuton. Suman ni halak na 'berjiwa
kerdil' do halak na tahuton. Ndang tagamon marbisuk halak na tahuton. Di hata
Indonesia, digoari do halak na tahutan on ima halak na “panic” manang "terburu-buru”
situtu. Na sai olo manghaporseai hata sipaoto. Na sai olo "menghalalkan
segala cara” alani biarna, sahat tu na manganahon hosa ni donganna, ro di na
tumundalhon Jahowa.
Dipasahat turpuk on do tu angka
naung loja jala gale laho mamorsan sitaonon, uju di habuangan sahat rodi na
naeng mulak nasida tu tano na nilehon ni Jahowa. Didok mandok teba ni Israel i
na tahuton i: “Dok hamu ma...". Margogo situtu do hape lapatan ni hata ni
Debata manang pandohan na taringot tu Debata laho mangurupi halak na tahuton.
Alani ondolan na parjolo laho mangadopi manang aha pe na masa di tongatonga ni
Covid-19 on ima na so jadi sirang hita sian hata ni Debata. Tongtong ma
tapatubegehon hata ni Debata, ala sasada i do ubat na ummarga mangalo pandemi
on. Lam ganda ma ringgas ni huria dohot parhalado nang ruas pe manjaha dohot
patubegehon hata ni Debata.
“Pir ma Tondimuna, unang hamu
mabiar.” Jumorbut do biar i sian sitaonon na songgop i. Ala sasintongna ndang
sitaonon i na manubuhon biar, roha na so porsea i do na bolas manubuhon biar.
Ai tung malua pe hita sian sitaonon i, alai molo ndang matua ganda jala ndang
lam matoras haporseaonta, bolas dope hita leleon ni roha biar i. Ndang adong
biar na so maralus sian Debata. rade hita laho marnida. Umbahen na didok, “Ida
ma Debatamuna i ro martubolhon dohot mamaloshon.” Marhite tanganNa sandiri do
ro Debata. Ibana sandiri do na manggarar dohot manalesehon saluhutna.
Mangalehon uhuman na dos tu nasa musu ni bangsoNa.
Ungkap ma mata ni angka na mapitung
dohot pinggol ni angka na nengel. Marhajingjang ma angka na pangpang songon
rusa, mariaia halak na ngungu, marbuhalbuhal ma aek di halongonan dohot sunge
di adaran (ay. 5-6). Ganup dibongoti asi ni roha dohot haluaon na sian Debata
hita, muba do panghilalaanta. Ungkap do parnidaanta, marbinege sipareonta,
humisar nang pamatangta. Mansohot ma nasa sitaonon na tinaon ni pamatang ni
jolma, sian pardagingon na partondion na tinubuhon ni dosa i. Dipasuang Debata
ma luhutna tu na denggan. Ndang holan dipasuang Debata angka naung sega binahen
ni dosa i. Dohot do masa nang hagogoon, halongangan, kekuatan yang ajaib di
haluaon na pinamasa ni Jahowa. Asa dung ro Jesus tu portibi on, marulakulak do
dipatupa Jesus angka tanda halongangan. Haroro ni Debata naung mangalehon
haluaon i gabe halalas ni roha godang tu saluhut jolma na tinompaNa jala Ibana
do na mandaoni sian habernitan naung nialaman ni jolma ondeng (ayat 5-7).
Sungkunsungkun na arga nuaeng ro tu
hita, rade do hita parsidohot di punguan na gok las ni roha on? Dompak dia do
hita nuaeng mangalangka, dompak hasongangan sisongon on do? Patar do i sian
ganup hamubaon na tarida di bagasan ngolunta si nuaeng. Hinsat sian ngolu na
sai holsoan, didondoni arsak ro di na di bagasan hagangguon, suman ni halak na
di halongonan, bongot tu ngolu na di bagasan pos ni roha, panghirimon, suman ni
ngolu na marbuhalbuhal, suman ni sunge di robean. Alani, molo mauas hita,
taloas ma Ibana ro tu hita, jala minum ma hita sian Ibana, asa tung sombu
uasta, jala gabe pir ma nang tondinta.
Mesias, ima Kristus i gabe mual ni
hangoluan na so ra suda (Joh. 4:14). Tano hasang, tano bangkalbangkal gabe
hatubuan ni arung dohot tolong (ay. 7). Ndang holan salpu na hasang i, alai
gabe bornok ma nang angka suansuanan na tubu di si. Taloas ma Debata mamboan
hita tu inganan na sonang i. Ngolu na hinirim ni Jahowa jumpang di bagasan
hita. Ndang pasombuon ni Tuhan i hita.
Na parpudi, mansai uli situtu dalan
na dompak Sion i (ay. 8). Ndang adong na tau manahuti angka pardalan, ndang
boluson ni angka binatang panoro (ay. 9), dipatudos tu dalan na sonang so
hariboriboan, dalan ni halak angka naung tinobus do dalan i. Di halak Israel,
digoari ma on pardalanan parpudi di nasida. Nunga ganjang pardalanan na gok
panamun naung binolus nasida nasailaon. Mulak ma nasida tu bagas ni Debata.
Turpuk on, mangalehon di hita pamotoan na tontu jala torang situtu taringot tu
dalan silehonon ni Jahowa tu hita di ari sogot, dalan hamuliaon na gok las ni
roha dohot hasonangan situtu. Songon na nidok ni ayat 10 on: “Jadi mulak ma
sogot halak angka na pinalua ni Jahowa, jala mariaia ro tu Sion; jala halalas
ni roha salelenglelengna di atas ulunasida, dapotan hilas dohot las ni roha
nasida, alai maporus ma anggo arsak dohot hoihoi." Amen.
Panurat Jamita
Pdt. Albert J.
P. Pasaribu, STh
Pendeta
Fungsional HKBP Kisaran Kota
Tidak ada komentar:
Posting Komentar