Jamita Evangelium Johannes 16:4b-15 Tondi Pangapul dohot Hasintongan

 

TONDI PANGAPUL DOHOT HASINTONGAN

Johannes 16:4b-15

Mansai dokdok do panghilalaan molo marsirang hita sian na tahaholongi , marsak jala borat panghilalaanta, boi do tubu tubagasan rohanta pandohan na mandok ise be dongan nami, ise be pangalualuan nami, ise be mangondihon hami, Pangalaho sisongoni ma namasa di turpuk on, dokdok jala borat rohani siseani marsirang dohot Jesus, Dipaboa Jesus do angka na  masa di Ibana dohot na naeng masa dungi borhat manaek ma Ibana tu banua ginjang. dipabotohon Jesus do na naeng borhat Ibana manopot na marsuru Ibana ima AmaNa i. Sude i, ndang hadodoan ni angka siseani dope, diboto Jesus do i sude. Ala ni i ma asa didok, “Godang dope sidohononHu tu hamu, alai ndang tarboan hamu dope i nuaeng .”Ndang tarboan lapatanna, ndang tarporsan manang tartahan ai mabalga hu jala madokdokhu; ndang siat tu pingkiran ni hajolmaonnasida, ai mamaolhu do i jala masongkalhu parsirangan alani parsaoran na mansai rosu na sai laonnai ,Asa boi diantusi nasida aha do na gabe sangkap dohot ulaon ni Jesus, gabe  dibagabagahon Ibana ma haroro ni Tondi Porbadia i. Digoar Jesus do Tondi Porbadia i ima Tondi Pangapul . dohot “Tondi Hasintongan na mandongani jala mangajari nasida dibagasan hasintongan

Tondi Pangapul dohot Hasintongan .Aha do hasintongan i? Jesus Kristus i sandiri mandok, “Ahu do dalani dohot hasintongan.” (Joh.14:6). Jadi, Ibana sandiri do hasintongan i dohot nasa na marhahonaan tu Ibana, i ma hata dohot patikNa, poda dohot pangajaranNa, ulaon dohot panobusionNa, haluaon dohot hangoluan na di bagasan Ibana dohot angka na asing.Na marhinorhon situtu do hasintonganNa i. Ndang holan di sisean i, tung disandok hajolmaon do. Tondi i ma Manogihon mangapuli, memimpin, manguluhon jala mangajari hita mananda  hasintongan i, manjalo jala manghaporseai hata ni Debata na laho sibaritahononta  Laos Tondi Porbadia i do muse na mangajarhon tu hita  angka nanaeng masa dope. i ma haluaon sijaloon ni na porsea ala ni ulaon panobusionNa i dohot hatigoran ni Uhum ni Debata. Ala hasintongan na di bagasanKristus i do diajarhon, gabe marsangap do Jesus i di bagasan dohot marhitehite ulaon ni Tondi Porbadia i. Ala ni i do umbahen na didok “PasangaponNa do Ahu.” Marsangap do Kristus i di tongatonga ni angka naung tinogihon ni Tondi Porbadia i tu haluaon, jala di bagasan Jesus na marsangap i marsangap ma nang Ama i.

Di ganup inganan, di ragam ni na masa nataadopi di ngolunta, disi do Tondi i mangalehon jaminan keselamatan dohot mangapuli/patoguhon rohanta. Tongtong do Debata hadir di tongatonganta marhite .Tondi i songon naung ni dok ni Jesus i. Tondi i do namanguluhon,mangajari, manogunogu, marmahani hita mangadopi ragam ni hamaolon di Portibion .lumobi ma di masa ni pandemic Covid 19 on  Hombar tu Topik ni Minggu di Parningotan ni Hasasaor ni Tondi Parbadia on “Tondi Pangapul dohot Hasintongan”. Naeng las rohanta atik pe godang mara sibolusonta. Aha ma lasni rohantai?  ima : nunga dilehon Debata tu hita arta na ummarga sian diriNa ima Tondina Parbadia. Tondi ni Debata doi Tondi Pangondian dohot Tondi Hasintongan na manogihon hita tu bagasan lasniroha

Tondi Panuturi dohot Pangapuli na sai tongtong mangalehon di hita habisuhon laho mamolati na denggan sian na roa, Mangurupi hita manalpuhon angka pangontak ni angka parsahiton na ro tu portibion , mangalehon parbinotoan taringot tu hasintongan jala mangalehon pangapulion tu na marsak roha , alani i hangoluhon ma  parbue ni Tondi i, ima Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon. Antong janghon ma Tondi Parbadia i jala hangoluhon hasintongan i. Amen