JAMITA MINGGU PSALMEN 34:12-18 HALAK PARTIGOR DIADOPAN NI DEBATA

 

HALAK PARTIGOR DIADOPAN NI DEBATA

Psalmen 34:12-18

 

Huria na hinahoongan di bagasan Kristus Jesus, halak partigor ndada marharoroan anggapan i sian penilaian ni diri sambing. Isarana, sasahalak mandok ia dirina ima songon sahalak partigor. Partigor ima halak na mangolu di bagasan hatigoran ni Jahowa jala mangulahonsa di bagasan ngoluna. Sipata maol do gabe halak partigor on molo mangida sian pambahenanna. Ala olo do sipata gabe targasip ala ni hatigoran i. Partigor i ingkon jongjong do ibana di nasa hatigoran. Molo peol diida ibana pangulahon ni uhum hatigoran i, ingkon pinsangon ni ibana jala dohononna ma na sintong i songon hatigoran. Molo didok halak partigor marlapatan ma i, nunga gabe karakter di ngolu ni sasahalak mangulahon hatigoran i. Tarida do saluhutna i sian pambahenanna, parangena, parrohaonna, jala nasa hata na ruar sian parangen. Jala marhite topik ni minggunta on na mandok halak partigor diadopan ni Debata. Tutu dihara do hita mangalapati hata ni Debata asa antusanta ma hita songon halak partigor naung pinatigor ni Debata di bagasan huaso ni Tuhanta Jesus Kristus dohot Tondi Parbadia.

Dipaboa parPsalmen do tu hita marhite turpuk on ngolu ni sahalak partigor i diadopan ni Debata. Halak partigor i tarida do sian parange dohot pangalahona. Halak partigor i dipature jala dipauli dibagasan biar mida Jahowa, manjagahon dila maradophon hajahaton jala bibir maradophon panghuling sipaotooto, sumurut sian hajahaton jala mangulahon nasa na denggan. Songon hata ni Debata na mandok “Unang ma ruar hata na busuk sian pamanganmuna; naeng ma na denggan na tau padengganhon na humurang, asa dapotan uli na umbegesa.” (Ef. 4:29). Halak partigor i tangkas do ruar sian pamanganna na hata na denggan na padengganhon unang ma ragam hata angka na jat alani pangalaho ni dila i, ai diok do sian sada pamangan do ruar pamujion dohot pamuraion. Ale angka donganku, ndang tama masa songon i! (Jak. 3:10). Alani i do taingot surat ni Apostel Paulus na mandok Pabotohon hamu ma habasaronmuna tu saluhut halak (Philippi 4:5).

Dila dohot bibir saurdut do di nasa hata na ruar sian pamangan. Halk partigor tutu dijamothon do anggo on. Memang tutu marharoroan sian roha do saluhutna i, alai di bagasan kondisi on gabe eksekutor do dila dohot bibir laho patulushon nasa na ni soarahon roha. Laos sian i ma botoonta gombaran hadirion ni halak i. Parpsalmen mandok pasiding angka i sian hajahaton dohot sipaotooto. Dibagasan roha ni halak partigor i sai ulaon na denggan diulahon jala hasiholan ni rohana do pareak hasonangan. Ido hasonangan ni halak partigor songon panindangion ni parPsalmen na mandok sai patubegehon ma tu ahu hasonangan dohot las ni roha, asa marolopolop holiholi, angka naung ginopuanmu. (Psalmen 51:10).

Pos ni roha ni halak partigor i diboto tangkas panatapan ni Jahowa di ibana. Sai manatap do mata ni Jahowa tu angka partigor, jala pinggolna tu angguknasida (34:16). Tutu ragam do hamaolon na niadopan ni halak partigor i, alai ndang sumurut ibana sian i ala tangkas panandaiaonna di Debata na so tadinghonon ni Jahowa ibana. Jahowa tongtong mandongani jala mangaramoti halak partigor i jala ditangihon Jahowa do nasa anggukangguk halak partigor i. Nasa pamaloshon tu angka na jat roha di halak partigor i, pos rohana  di Debata ai didabuhon Debata do uhum tu angka parjahat i di hajaton nasida i. Marsiajar sian parPsalmen on, hapengani ndada rohanta na ingkon saut laho madabuhon uhum tu angka hajahoton ni jolma alai holan sian Debata sambing do haroroni panguhuman i. Alani i do nasa alualu pinasahat tu Debata jala pos roha di Debata ingkon saut lomo ni roha ni Debata dinasa pangalualuanta tu Ibana. Umbahen i do didok tanggil do sipareon ni Jahowa di nasa anggukangguk halak partigor i. Mangangguhi do angka partigor, gabe ditangihon Jahowa do, jala dipalua nasida sian hagogotannasida sudena (Psalmen 34:18).

Huria ni Tuhanta, on ma dihara tu hita asa menghangoluhon ngolu songon halak partigor hita. Nunga gabe patar hatigoran i di hita songon halak naung mangolu di bagasan Kristus Jesus Tuhanta i. Maniru ngulu ni ParPsalmen dison, gabe karakter jala hatandianta ma hatigoran i di bagasan ngolunta. On ma parasingan halak partigor diadopan ni Debata maradophon angka ngolu hasiangan. Songon didok hata i “alai anggo halak partigor i mangolu do binahen ni parsihohotna marhaporseaon (Hab 2:4).” Amen

 

Panurat Jamita

Pdt. Albert J. P. Pasaribu, STh

Pandita Fungsional HKBP Kisaran Kota